کراچی میں لوڈشیڈنگ کے خلاف مظاہروں میں مزید شدت

393

کراچی: شہر قائد میں کے الیکٹرک کی جانب سے دن اور رات کے اوقات میں طے شدہ اوقات اور غیر علانیہ لوڈشیڈنگ کے خلاف احتجاجی مظاہروں میں مزید شدت آگئی۔  صفورا اور قائد آباد میں بجلی کی عدم فراہمی پر مکینوں نے احتجاج کرتے ہوئے ٹریفک معطل کر دیا جس کے باعث شہریوں کو بھی شدید مشکلات کا سامنا کرنا پڑا۔

مظاہرین کا کہنا تھا کہ شہر میں اگر کوئی کام پابندی اور ایمانداری سے کیا جا رہا ہے تو وہ کے الیکٹرک کی علانیہ اور غیر علانیہ لوڈشیڈنگ ہے۔ کے الیکٹرک نے دن اور رات کا سکھ اور چین چھین لیا ہے۔ انہوں نے کہا کہ دن کی لوڈشیڈنگ کسی نہ کسی صورت برداشت ہو جاتی ہے رات کی جانے لوڈشیڈنگ نے عاجز کر دیا ہے اور مجال ہے کہ ہمارے حکمرانوں اور نیپرا کے حکام کو ہوش آجائے۔

مظاہرین کا کہنا تھا کہ اگر ریکارڈ چیک کیا جائے تو مئی کے مہینے سے شہر میں بدترین لوڈشیڈنگ کا جو سلسلہ شروع ہوا تھا وہ تاحال جاری ہے جبکہ ان مہینوں کے آنے والے بجلی کے بلوں میں فیول ایڈجسٹمنٹ چارجز بھی لگ کر آ رہے ہیں۔

دریں اثنا قائد آباد قذافی پل منزل پمپ کی جانب علاقہ مکینوں نے بجلی اور پانی کی عدم فراہمی پر احتجاج کرتے ہوئے سڑک کے دونوں ٹریک بند کر دیے جس کے باعث ٹریفک کی روانی شدید متاثر ہونے سے گاڑیوں کی طویل قطاریں لگ گئیں اور بدترین ٹریفک جام ہوگیا۔