عمران خان کا پراجیکٹ ناکام ہوچکا ہے اس کو لانچ کرنے والے پریشان ہیں، سعد رفیق

141

لاہور: پاکستان مسلم لیگ ن کے رہنما اور وفاقی وزیر خواجہ سعد رفیق نے کہا ہے کہ ہم آئین اور جمہوریت کی بالادستی کیلئے اکھٹے ہوئے ہیں، عمران خان کو اس لیے لایا گیا کہ بے نظیر اور نواز شریف کے چہرے اچھے نہیں لگتے تھے ، عمران خان کا پراجیکٹ ناکام ہوچکا ، اس کو لانچ کرنے والے پریشان ہیں۔

احتساب عدالت لاہور کے باہر ن لیگی رہنما خواجہ سعد رفیق نے میڈیا سے گفتگوکرتے ہوئے کہا کہ ہمار ے بڑوں نے قیام پاکستان میں کردار ادا کیا، جو کوئی بھی بات کرتا ہے اس پر الزامات عائد ہوتے ہیں۔ ایسے آدمی کو سامنے لا کر کھڑا کیا گیا جس کی کوئی سیاسی جدوجہد نہیں ہے، ایسے شخص کو سیاست میں لایا گیا، جس کا سیاسی میدان میں کوئی کردار نہیں رہا۔

ن لیگی رہنما نے سوال کیا کہ کیا ہم نے ملک کا مال لوٹا؟ کہاں ہے وہ لوٹ کا مال، اس کا ثبوت کہاں ہے، ہم جیلوں میں گئے، بڑی قربانیاں دیں، کیا گناہ کیا جو عدم اعتماد کیا،عدم اعتماد لانے کے عمل میں اسٹیبلشمنٹ کا کوئی کردار ثابت کریں۔

سعد رفیق کا کہنا تھا کہ کیا آئین عدم اعتماد کا راستہ نہیں دیتا؟ ۔تماشہ لگایا ہے جب آئین عدم اعتماد کا راستہ دیتا ہے آپ نے وہ بھی روک دیا، جب عدالت فیصلہ کرتی ہے وہ ماننا پڑتا ہے، ماننا نہ ماننا انصاف کے تقاضوں پر ہے، ذہنوں کو آلودہ کیا گیا ،کیسا مہاتما ہے۔

ان کا کہنا تھا کہ یہ اپنی باتوں سے نوجوانوں گمراہ کررہا ہے، 2018 کا الیکشن چھینا گیا لیکن نہ چاہتے ہوئے بھی ہم نیمان لیا، سیاسی حریف سب ایک طرف کھڑے ہیں۔ سعد رفیق نے مزید کہا کہ آپ معیشت کوتباہ کرکے چلے گئے۔

انہوں نے کہا ہے کہ ایک آدمی اداروں کو مداخلت کی دعوت دیتا ہے ، بار بار آئین کی خلاف ورزی کرتا ہے، عمران خان کی دھمکیوں کے زور پر الیکشن نہیں ہوگا، پنجاب کو کچھ نہیں ہوگا، چلتا رہے گا۔