اسلام آباد ہائی کورٹ نے اسلامی نظریاتی کونسل کے چیئرمین ڈاکٹر قبلہ ایاز کی بطور رکن بورڈ آف گورنرز برطرفی کا حکم معطل کرکے عہدے پر بحال کرنے کا حکم دے دیا-
جسٹس سردار اعجاز اسحق خان نے مقدمے کی سماعت کی، جس میں ڈاکٹر قبلہ ایاز کی جانب سے بیرسٹر عمر اعجاز گیلانی پیش ہوئے اور عدالت کوبتایا کہ قانون میں بورڈ آف گورنرز کی برطرفی کا اختیار صرف صدر مملکت کو ہے۔ دو سالہ مدت منصبی کو قانونی تحفظ حاصل ہے۔
بیرسٹر عمر اعجاز گیلانی نے عدالت کو دلائل دیتے ہوئے بتایا کہ بورڈ آف گورنرز کا کام ہی انتظامیہ کا احتساب کرنا ہے۔ انتظامیہ رکن بورڈ آف گورنرز کو معطل کیسے کر سکتی ہے؟۔ عدالت نے اسلامی یونیورسٹی کے فیصلے کے خلاف ڈاکٹر قبلہ ایاز کی درخواست پر نوٹسز جاری کرتے ہوئے کیس کی مزید سماعت 7 جولائی تک ملتوی کردی۔
واضح رہے کہ ڈاکٹر قبلہ ایاز اسلامک انٹرنیشنل یونیورسٹی کے بورڈ آف گورنرز کے رکن تھے، جنہیں یونیورسٹی انتظامیہ نے عہدے سے برطرف کردیا تھا۔
