پٹرولیم نرخ بڑھنے سے مہنگائی کی شرح میں ریکارڈ اضافہ

157
ماہانہ اکنامک آؤٹ لک رپورٹ جاری، مہنگائی میں مزید اضافے کا عندیہ

اسلام آباد: ملک میں پیٹرولیم مصنوعات کی قیمتوں میں اضافے کے بعد حالیہ ایک ہفتے کے دوران ملک میں مہنگائی کی شرح میں 1.01فیصد کا ریکارڈ اضافہ ہوا ہے۔

 وفاقی ادارہ شماریات کی جانب سے جاری کردہ مہنگائی بارے ہفتہ وار رپورٹ میں بتایا گیا کہ سالانہ بنیادوں پر مہنگائی کی شرح 28.05فیصد رہی جبکہ 32اشیائے ضروریہ کی قیمتوں میں اضافہ، 4 کی قیمتوں میں کمی اور 15 اشیائے ضروریہ کی قیمتیں مستحکم رہی ہیں۔

محکمہ شماریات کے مطابق 24 جون کو ختم ہونے والے ہفتے کے دوران مہنگائی کی شرح اس سے پچھلے ہفتے کے مقابلے میں 1.01 فیصد زائد رہی۔

 اعدادوشمار کے مطابق گزشتہ ہفتے کے دوران جن اشیا کی قیمتوں میں اضافہ ہوا، ان میں پیاز، آلو، دال چنا،دال مسور،دال ماش،دال مونگ،آٹا،، چائے، گھی بریڈ، ٹوائلٹ صابن، صوفی واشنگ صابن سمیت دیگر اشیا شامل ہیں۔

علاوہ ازیں جن اشیا کی قیمتوں میں گزشتہ ہفتے کے دوران کمی ریکارڈ کی گئی ان میں ٹماٹر،چکن،کیلا اور سرسوں کا تیل شامل ہیں۔