ڈیووس(مانیٹر نگ ڈ یسک ) سعودی عرب نے عندیہ دیا ہے کہ وہ پاکستانی اسٹیٹ بینک میں رکھے 3 ارب ڈالر کی رقم جلد واپس نہیں لے گا اور یوں اس کی مدت بڑھانے پر رضامندی ظاہرکی ہے۔ایکسپریس نیوز کے مطابق سعودی وزیر خزانہ محمد الجدان نے خبررساں اداروں کو بتایا کہ ہم پاکستان میں تین ارب ڈالر کی رقم جمع رکھنے کی مدت میں آضافے پر حتمی کام کررہے ہیں۔ انہوں نے یہ ورلڈ اکنامک فورم کے موقع پر ذیلی ملاقاتوں (سائیڈ میٹنگ) میں کہا ہے۔سعودی عرب نے پاکستان میں زرمبادلہ کے ذخائرایک حد تک برقرار رکھنے پر گزشتہ برس اسٹیٹ بینک میں تین ارب ڈالر کی رقم جمع کرائی تھی۔اگرچہ سعودی وزیر نے اس کی مزید تفصیلات نہیں بتائی ہیں لیکن یکم مئی کو دونوں ممالک نے مشترکہ اعلان کیا تھا کہ وہ جمع شدہ رقم کی مہلت مزید بڑھانے پر گفتگو کریں گے۔
