کراچی :پاکستان آنے والے مسافروں کے لیے کوویڈ پروٹوکول میں تبدیلی کے بعد سول ایوی ایشن اتھارٹی نے نیا سفری ہدایت نامہ جاری کردیا۔
تفصیلات کے مطابق پاکستان آنے والے مسافروں کے لیے کوویڈ پروٹوکول میں تبدیلی کرتے ہوئے مکمل ویکسینیٹڈ افراد کے لئے پی سی آر ٹیسٹ کی شرط ختم کردی۔ اس حوالے سول ایوی ایشن اتھارٹی نے نیا سفری ہدایت نامہ جاری کردیا ۔
سول ایوی ایشن کے ہدایت نامے میں کہا گیا ہے کہ نئے پروٹوکول 24 فروری رات ایک بجے سے نافذ العمل ہوں گے۔ سی اے اے کا کہنا ہے کہ وہ مسافر جو مکمل ویکسینیٹڈ ہیں انھیں پی سی آر رپورٹ دکھانے کی ضرورت نہیں جبکہ ایسے مسافر جو مکمل ویکسینیٹڈ نہیں اور عمر 12 سال سے زائد ہو ان کو نیگیٹو پی سی آر ٹیسٹ رزلٹ دکھانا لازمی قرار دیا ہے۔
مراسلے میں کہا گیا ہے کہ ہوائی سفر کے ذریعے پاکستان آنے والوں کے لئے فل ویکسینیشن اب لازمی شرط ہے، ماسوائے ان مسافروں کے جن کو 6 جنوری کے لیٹر نمبر 801/A/Ops III /NCOC-01 کے تحت کسی قسم کا استثنا دیا گیا ہو۔12 سال سے کم عمر کے مسافروں کو فل ویکسینیشن کی شرط سے استثنا حاصل ہوگا، تاہم 12 سے 18 سال تک کے مسافر 31 مارچ 2022 تک فل ویکسینیشن کے بغیر پاکستان اسکیں گے۔ڈیپورٹ ہونے والے مسافر اور بارڈر ٹرمینلز پر پیدل پہنچنے والے حضرات ریپڈ اینٹیجن ٹیسٹ مثبت آنے کی صورت میں اپنے گھر پر 10 دن کا قرنطینہ کریں گے۔
