امریکا روس اور یوکرائن میں جنگ کی آگ بھڑکارہا ہے‘ چین

بیجنگ (انٹرنیشنل ڈیسک) چین نے امریکا اور نیٹو پر روس اور یوکرائن کو جنگ کے لیے اکسانے کا الزام عائد کردیا۔ چینی وزارت خارجہ کے ترجمان کا کہنا ہے کہ مغربی ممالک جان بوجھ کر جنگ کے خطرہ کو بڑھا چڑھا کر پیش کررہے ہیں۔ ادھر واشنگٹن نے الزام عائد کیا ہے کہ بیجنگ موقع سے فائدہ اٹھا کر بحرالکاہل میں جارحیت کرسکتا ہے۔ دوسری جانب نیٹو کا کہنا ہے کہ روس کی جانب سے یوکرائنی سرحد سے فوجی دستوں کی واپسی کے اعلانات دنیا کی نظروں میں دھول جھونکنے والے دعوے ہیں۔