لاہور: پاکستان سپر لیگ(پی ایس ایل)کے ساتویں ایڈیشن کی ٹکٹوں کی فروخت شروع ہوگئی۔پاکستان کرکٹ بورڈ نے شائقین کرکٹ کو 17 جنوری تک بک کرائی جانے والی ٹکٹوں پر خصوصی پیشکش کی ہے۔
پی سی بی کے مطابق 17 جنوری تک ٹکٹ بک کروانے والے شائقین کو فرسٹ کلاس اور جنرل اسٹینڈ کی ٹکٹوں پر خصوصی رعایت ملے گی جس کے تحت جنرل اسٹینڈ کا ٹکٹ 500 ، فرسٹ کلاس کا 1500، پریمیئم انکلوڑر 2 ہزار اور وی آئی پی ٹکٹ 2500 روپے کا ہوگا۔
پی سی بی کے مطابق پی ایس ایل کے فائنل میچ کے لیے جنرل اسٹینڈ کا ٹکٹ 1500 کا ہوگا، اسی طرح فرسٹ کلاس 2500 ، پریمیئم 3000 اور وی آئی پی انکلوڑر کا ٹکٹ 4ہزار روپے کا ہوگا جب کہ وسیم اکرم اور وقاریونس انکلوڑرز کے ٹکٹ 4 سے 7 ہزار روپے میں ملیں گے، اس کے علاوہ 6 ڈبل ہیڈرز کے دنوں میں جنرل اسٹینڈ کا ٹکٹ ایک ہزار کا ہوگا۔پاکستان کرکٹ بورڈ کے مطابق، پی ایس ایل میں کم از کم ٹکٹ کی قیمت 250 روپے ہے۔
پی سی بی کا کہنا ہیکہ ٹکٹس خریدتے وقت کووڈ ویکسی نیشن سرٹیفکیٹ دکھانا لازمی ہوگا جب کہ ایک شناختی کارڈ پر زیادہ سے زیادہ 6 ٹکٹ خریدے جا سکیں گے۔واضح رہیکہ پی ایس ایل 7 کا آغاز 27 جنوری سے ہوگا ، ایونٹ کے 15 میچز کراچی جبکہ 19 میچز لاہور میں کھیلے جائیں گے۔
