اسلام آباد: سابق صدر پاکستان اور پاکستان پیپلزپارٹی پارلیمنٹرینز کے صدر آصف علی زرداری نے نئے سال کی آمد پر عوام کے لئے نیک خواہشات کا اظہار کرتے ہوئے کہا ہے کہ دعا ہے کہ 2022عوام کے لئے خوشیوں اور خوشحالی کا سال ہو۔
میڈیا آفس اسلام آباد سے جاری ہونے والے یک بیان میں سابق صدر نے کہا کہ عوام کو بھوک اور معاشی بدحالی سے نجات دلوا کر محترمہ بینظیر بھٹو شہید کے خواب کی تعبیر کریں گے۔ جہالت، بیروزگاری، عدم برداشت اور شدت پسندی کے خلاف جدوجہد جاری رکھیں گے۔ آصف علی زرداری نے کہا کہ پاکستان پیپلزپارٹی چیئرمین بلاول بھٹو زرداری کی قیادت میں عوام کو مشکلات سے نجات دلوائے گی۔ خود مختار پاکستان، بااختیار پارلیمنٹ اور خوشحال عوام ہماری منزل ہے۔ انہوں نے کہا کہ ہر طرح کی دہشت سے پاک معاشرہ شہریوں کا بنیادی حق ہے۔
