سندھ میں بلدیات کے ساتھ تباہ کن کھیل

حکومت سندھ نے اسمبلی سے بلدیاتی قوانین میں تبدیلی کا بل منظور کرا لیا ہے اس کے خلاف جماعت اسلامی نے وزیراعلیٰ سندھ کو قانونی نوٹس بھی دیا ہے اور احتجاج کا اعلان بھی کر دیا ہے دیگر اپوزیشن جماعتوں نے بھی اس کے خلاف احتجاج اور اسے مسترد کرنے کا اعلان کیا ہے۔ وفاق کے نمائندے گورنر سندھ نے بل مسترد کرکے حکومت کو واپس کر دیا ہے۔ اس پر اخبارات اور دیگر ذرائع ابلاغ میں شور مچا ہوا ہے کہ پی ٹی آئی نے بل مسترد کر دیا۔ یہ بل اب مسترد ہو نہیں سکتا۔ یہ ممکن ہے کہ اس میں کچھ ترامیم کر لی جائیں۔ اگر حکومت بل کو جوں کا توں دوبارہ منظور کرکے گورنر کو بھیج دے تو وہ اسے تسلیم کرے یا مسترد۔ 14 دن میں وہ ازخود نافذ قرار پائے گا۔ جماعت اسلامی حکومت کے عزائم سے واقف تھی اس لیے وہ پہلے ہی بلدیاتی قوانین میں اصلاح کے لیے تحریک چلا رہی ہے جب سے بل منظور کرایا گیا ہے جماعت اسلامی نے اپنی جدوجہد مزید تیز کر دی ہے۔ تماشا یہ ہے کہ جن پارٹیوں نے ملک کے سب سے بڑے شہر کی بلدیہ کو تباہ کیا ان میں پیپلز پارٹی اور ایم کیو ایم شامل ہیں۔ ایم کیو ایم 35 برس اس شہر اور حیدرآباد پر قابض رہی جس نے سندھ کے دیگر باشندوں میں احساس محرومی پیدا کیا اور اس کے نتیجے میںایک نئی سوچ پروان چڑھی جسے پیپلز پارٹی کی حکومت نے باقاعدہ مہم کے ذریعے قانون اور اسمبلی میں اکثریت کے بل پر کراچی و حیدرآباد کے شہریوں کے حقوق کے ڈاکے کے لیے استعمال کیا۔ شہری حکومت کے درجنوں محکمے حکومت سندھ گزشتہ برسوں میں براہ راست اپنے کنٹرول میں لے چکی ہے اس قانون کے ذریعے مزید تباہی آنے والی ہے۔ کراچی و حیدرآباد کے شہری روزگار سے محروم ہو جائیں گے ظلم تو یہ ہے کہ کراچی اور حیدرآباد کی بلدیات کو تباہ کرنے والی ایم کیو ایم بھی اصلاح کرنے نکل کھڑی ہوئی ہے اسے تو کراچی کو لوٹنے کا حساب دینا چاہیے۔ چائنا کٹنگ، پارکوں پر قبضے، بجٹ میں گڑبڑ یہ سارے کام اس کے دور میں ہوئے۔ یہی دیکھتے ہوئے سندھ حکومت نے تمام اداروں کو براہ راست صوبے کے کنٹرول میں لے لیا کیونکہ وہ کسی طور بھی ان شہروں سے منتخب ہو کر نہیں آسکتے تھے۔ اب جبکہ بلدیاتی انتخابات کا وقت قریب آرہا ہے یہ سب جماعتیں نکل کھڑی ہوئی ہیں۔ وزیراعلیٰ نے اپوزیشن سے مذاکرات کے لیے رضامندی کی بات کی ہے۔ مذاکرات نہیں قوانین کو آئین کے مطابق بنانے کی ضرورت ہے۔