فلپائنی فوج نے شدت پسند داعش سے منسلک مقامی تنظیم کے سربراہ کو ہلاک کردیا

135

منیلا (انٹرنیشنل ڈیسک) فلپائن میں دہشت گرد تنظیم داعش سے منسلک ایک گروہ کے نئے سربراہ سمیت 4شدت پسندوں کو ہلاک کر دیا گیا ہے۔ فلپائن کی فوج نے بتایا ہے کہ ملک کے جنوبی حصے میں سرکاری فوجی دستوں کے ساتھ فائرنگ کے تبادلے میں یہ افراد مارے گئے۔ فوج نے لاشوں کی شناخت کے بعد تصدیق کی ہے کہ دولت اسلامیہ گروہ کا سردار عاصم کریندا عرف ابو عظیم اور اس کے ساتھی ہلاک ہوگئے ہیں۔ دہشت گرد گروہ دولت اسلامیہ جنوبی فلپائن میں ہونے والے متعدد بم دھماکوں میں ملوث رہا ہے۔واضح رہے کہ اس سے قبل داعش کے سربراہ ابوبکر بغدادی کی ہلاکت کے بعد سے کہا جارہا تھا کہ داعش کی کمر توڑ دی گئی،تاہم داعش کے جنگجوؤں نے ایک بار پھر خود کو منظم کرنا شروع کردیا ہے۔