کراچی ( رپورٹ : حماد حسین) ثانوی تعلیمی بورڈ کراچی کے چیئرمین سید شرف علی شاہ نے (ایس ایس سی) پارٹ ٹو جماعت دہم سائنس گروپ کے سالانہ امتحانات برائے سال 2021 کے نتائج کا اعلان کر دیا ہے۔
چیئرمین بورڈ سید شرف علی شاہ نے میٹرک کے امتحانات کے نتائج کااعلان کرتے ہوئے کہا کہ طلباء وطالبا ت یہ نتائج بورڈ کی ویب سائٹ www.bsek.edu.pk پر اور ایس ایم ایس سروس bsekلکھ کر اسپیس دیں اور اپنا رول نمبر لکھ کر 8583 پر بھیج کر نتائج دیکھ سکتے ہیں۔
تفصیلات کے مطابق سائنس گروپ میں 156287 طلباء و طالبات رجسٹر ڈ ہوئے جن میں سے 148940طلباء و طالبات امتحانات میں شریک ہوئے جبکہ دو نوں پرچوں میں غیر حاضر طلباء وطالبات کی تعداد 2263 اور صرف ایک پرچے میں غیر حاضر طلباء وطالبات کی تعداد 7347 رہی۔
امتحانات میں شامل ہونے والوں میں 84945طلباء اور 71342 طالبات شامل ہیں۔ کامیابی کا تناسب 98.48فیصد رہا، کامیاب طلباء و طالبات میں سے 41476 نے اے ون گریڈ، 24977 نے اے گریڈ، 23754 نے Bگریڈ، 23213 نے Cگریڈ، 22444نے D گریڈ اور 10204 نے Eگریڈ حاصل کیا۔ جبکہ اضافی پرچہ دینے والے کامیاب طلباء و طالبات کی تعداد 609 رہی اس طرح تمام پرچوں میں کامیاب طلباء وطالبات کی تعداد 146677 رہی۔
