تیاریاں مکمل ہیں ، پاک بھارت میچز دبائو سے بھر پور ہوتے ہیں ، میتھیو ہیڈن

147

دبئی(نمائندہ خصوصی) قومی ٹیم کے بیٹنگ کنسلٹنٹ میتھیو ہیڈن نے کہا ہے کہ پاکستان اور بھارت کے میچز دبا سے بھرپور ہوتے ہیں لیکن ہماری تیاریاں مکمل ہیں۔یو اے ای سے ورچوئل پریس کانفرنس کے دوران میتھیو ہیڈن نے کہا کہ کبھی سوچا نہیں تھا کہ کسی وقت پاکستان کے ڈریسنگ روم کا حصہ بنوں گا، کوچنگ کا موقع ملنا بڑے اعزاز کی بات ہے، اپنے تجربے سے گرین شرٹس کو فائدہ پہنچانے کی کوشش کروں گا۔میتھیو ہیڈن نے کہا کہ ہم ورلڈ کپ جیتنا چاہتے ہیں، خاص طور پر پہلے میچ سے فتح کا آغاز کے لیے پرعزم ہیں، ہمیں کسی غیر ضروری دبا ئوکا شکار ہوئے بغیر اپنا بہترین کھیل پیش کرنا ہوگا، ٹیم میں بابر اعظم، رضوان حفیظ اور فخرزمان سمیت میچ ونرز موجود ہیں، ہم پریشر میں پرفارم کرسکتے ہیں اور کھلاڑیوں کا مورال بلند ہے۔ پاکستان اور بھارت کے میچز دبائو سے بھرپور ہوتے ہیں، اس کی تیاریاں مکمل ہیں، ماضی کے اعداد و شمار کچھ بھی ہوں لیکن میچ کے دن بہترین کارکردگی دکھانا ہوگی۔قومی ٹیم کے بیٹنگ کنسلٹنٹ کا کہنا تھا کہ یو اے ای کی کنڈیشنز میں 200سے زائد رنز کا ہدف حاصل کرنا آسان نہیں ہوگا، لگتا ہے یہاں 180سے 190 کا مجموعہ دیکھنے میں آئے گا، پاکستان کے بولنگ یونٹ میں ہر طرح کا ٹیلنٹ ہے لیکن ہمیں منصوبہ بندی پر عمل درآمد کرنا ہوگا، جنوبی افریقا کیخلاف وارم میچ میں شاہین شاہ آفریدی نے بہترین بولنگ کی، 19واں اوور کرانا آسان نہیں ہوتا، حسن علی میں بھی صلاحیت موجود ہے۔