کراچی (اسٹاف رپورٹر)کراچی میں پولیس اہلکار کے قتل، ریڈ بک میں نامزد اور دیگر جرائم میں ملوث ایک ملزم کے ملتان کی سینٹرل جیل میں قید ہونے کا انکشاف ہوا ہے۔پولیس ذرائع کے مطابق قانونی کارروائی کے بعد ملزم نوید احمد کو کاؤنٹر ٹیررازم ڈپارٹمنٹ کراچی کی ٹیم ملتان جیل سے کراچی لائے گی اور کراچی میں ملزم کے خلاف پولیس اہلکار کے قتل کا ٹرائل کیا جائے گا۔پولیس ذرائع کے مطابق ملزم نوید احمد کو ملتان پولیس نے گرفتار کیا تھا جو ملتان میں ایک مقدمے میں مطلوب تھا۔پولیس ذرائع کے مطابق ملزم کو ملتان کی عدالت سے سزا سنائی جا چکی ہے اور وہ وہیں کی جیل میں قید کاٹ رہا ہے۔ پولیس ذرائع کے مطابق ملزم کاؤنٹر ٹیررازم ڈپارٹمنٹ سندھ کو 2008 سے مطلوب ہے۔ سی ٹی ڈی ذرائع کے مطابق ملزم نوید احمد کراچی میں سی ٹی ڈی کے اہلکار کو قتل کر کے فرار ہوگیا تھا۔ ملزم کا نام کاؤنٹر ٹیررازم ڈپارٹمنٹ سندھ کی ریڈ بک میں بھی شامل ہے۔
