سپریم کورٹ کا خورشید شاہ کو رہا کرنے کا حکم

187

اسلام آباد: سپریم کورٹ نے رہنما پاکستان پیپلز پارٹی خورشید شاہ کو آمدن سے زائد اثاثہ جات کیس میں ضمانت پر رہا کرنے کا حکم دے دیا ہے۔

تفصیلات کے مطابق جسٹس عمر عطا بندیال کی سربراہی میں سپریم کورٹ کے 2 رکنی بینچ نے خورشید شاہ کی درخواست ضمانت پر سماعت کی، عدالت نے ایک کروڑ روپے کے مچلکے جمع کروانے کے عوض خورشید شاہ کی درخواست ضمانت منظور کرلی ہے۔ عدالت نے فیصلے میں کہا کہ ان کا نام ای سی ایل میں موجود رہے گا۔

جسٹس عمر عطا بندیال نے کہا کہ نیب تحقیقات کرے لیکن خورشید شاہ کو جیل میں مستقل نہ رکھا جائے، انہیں مزید جیل میں رکھنے کی ٹھوس وجوہات نہیں ہے۔

خیال رہے کہ سندھ ہائیکورٹ نے پی پی رہنما خورشید شاہ کی ضمانت کو مسترد کیا تھا جسے انہوں نے سپریم کورٹ میں چیلنج کیا تھا۔

واضح رہے کہ قومی احتساب بیورو (نیب) نے پی پی رہنما خور شید شاہ کو آمدن سے زائد اثاثوں کے کیس میں 18 ستمبر 2019 کو گرفتار کیا تھا۔