پی ٹی آئی کے سینئر رہنما انجینئر افتخار چودھری نے جدہ میں نمائندہ جسارت سید مسرت خلیل سے خصوصی گفتگو میں کہا ہے کہ سعودی عرب میں مقیم پاکستانی وطن عزیز کا اصل اثاثہ ہیں، جنہوں نے پاکستان کی ترقی میں لازوال کردار ادا کیا ہے۔ وزیر اعظم سمندر پارمقیم تمام تارکین وطن کو اپنے دل کے قریب رکھتے ہیں۔ یاد رہے انجینئر افتخار جدہ میں طویل عرصہ مقیم رہے ہیں اور انہوں نے اس دوران بہت سے پاکستانیوں کو روزگار کے حصول میں مدد کی۔ کمیونٹی نے ان کی خدمات کے اعتراف میں گولڈ میڈل سے نوازا۔افتخار چودھری مجلس محصورین پاکستان کے بانی اراکین میں شمار ہوتے ہیں۔ کشمیرکاز، مسئلہ محصورین اور چودھری رحمت علی جیسے معاملات میں انہوں نے اپنا ہرممکن بہترین کردار ادا کیا۔ انجینئر افتخار کے عرب حلقوں میں گہرے روابط ہیں اور وہ عربی زبان پر عبور رکھتے ہیں۔