شاہ محمود قریشی کی برطانوی ہم منصب سے ملاقات، مقبوضہ کشمیر سے متعلق ڈوزیئر پیش کردیا

135

اسلام آباد: وزیر خارجہ شاہ محمود قریشی نے مقبوضہ جموں و کشمیر میں قابض بھارتی افواج کے تین ہزار سے زائد جنگی جرائم کے ٹھوس اور ناقابلِ تردید شواہد پر مبنی دستاویزی ثبوت “ڈوزیئر” برطانوی ہم منصب کو پیش کیا۔

تفسیلات کے مطابق وزیرخارجہ شاہ محمودقریشی نے برطانوی ہم منصب سے ملاقات کی ہے، برطانوی وزیر خارجہ لِز ٹرس کے ساتھ ملاقات برطانوی دفتر خارجہ میں ہوئی، جس میں پاک، برطانیہ دو طرفہ تعلقات، باہمی دلچسپی کے کثیرالجہتی شعبہ جات میں دو طرفہ تعاون کے فروغ اور علاقائی سلامتی سمیت اہم امور پر تبادلہ خیال کیا گیا، شاہ محمود قریشی نے برطانوی وزیر خارجہ کو منصب سنبھالنے پر مبارکباد دی۔

وزیر خارجہ نے پاکستان اور برطانیہ کے درمیان دو طرفہ تعلقات کے استحکام کیلئے، برطانوی ہم منصب کے ساتھ مل کر کام کرنے کا عندیہ دیا تاکہ دو طرفہ اسٹریٹیجک تعلقات کو اگلے مرحلے تک لے جانے کیلئے مشترکہ کوششیں بروئے کار لائی جا سکیں، وزیر خارجہ نے برطانوی ہم منصب کو مقبوضہ جموں و کشمیر میں جاری بھارتی مظالم اور خطے کے امن کو درپیش خطرات سے آگاہ کیا۔

اس موقع پر برطانوی ہم منصب سے گفتگو کرتے ہوئے شاہ محمود قریشی نے کہا کہ مقبوضہ کشمیر میں انسانی حقوق کی سنگین پامالیوں کے حوالے سے برطانوی پارلیمنٹ میں مباحثے کا انعقاد، قابلِ تحسین ہے، ہمیں توقع ہے کہ برطانیہ، نہتے کشمیریوں کو بھارتی استبداد سے نجات دلانے اور ان کے جائز حق “حق خود ارادیت” کے حصول کیلئے اپنا موثر کردار ادا کریگا۔

شاہ محمود قریشی نے مقبوضہ جموں و کشمیر میں قابض بھارتی افواج کے تین ہزار سے زائد جنگی جرائم کے ٹھوس اور ناقابلِ تردید شواہد پر مبنی دستاویزی ثبوت “ڈوزیئر” برطانوی ہم منصب کو پیش کیا ،دونوں وزرائے خارجہ کے مابین افغانستان کی ابھرتی ہوئی صورتحال پر تبادلہ خیال ہوا، وزیر خارجہ کا کہنا تھا کہ موجودہ صورتحال میں پاکستان کی اولین ترجیح افغانستان کو پنپتے ہوئے انسانی بحران سے بچانا ہے۔

وزیر خارجہ نے پاکستان کی جانب سے، افغان شہریوں کو بھجوائی گئی انسانی امداد اور “انسانی راہداری” (Human Corridor ) کے قیام سے برطانوی وزیر خارجہ کوبتایا کہ پاکستان نے کابل سے دس ہزار سے زائد غیر ملکی شہریوں کو بحفاظت نکالنے میں معاونت فراہم کی، موجودہ حالات میں ضرورت اس بات کی ہے کہ عالمی برادری ماضی کی غلطیوں سے سبق سیکھتے ہوئے، افغانستان کو تنہا نہ چھوڑے، عالمی برادری، افغانستان کو انسانی بحران سے بچانے کیلئے ان کی انسانی و معاشی معاونت کو یقینی بنائے۔

مخدوم شاہ محمود قریشی نے پاک برطانیہ، اسٹرٹیجک مذاکرات کے پانچویں جائزہ اجلاس کے حوالے سے برطانوی وزیر خارجہ الزبتھ ٹرس کو دورہ پاکستان کی دعوت دی جسے انہوں نے قبول کیا۔