امریکی ریاست میسوری میں ایف بی آئی نے ایک سیاہ فام شخص کی گرفتاری پر تحقیقات کا آغاز کردیا ہے.
امریکی نشریاتی ادارے اے بی سی کے مطابق گرفتاری کے دوران سیل فون ویڈیو میں تین سفید فام افسران نے ملزم کو اپنے کتے سے بار بار کٹوایا۔
ووڈسن ٹیرس پولیس چیف رینڈی ہالسٹڈ نے سینٹ لوئس پوسٹ ڈسپیچ کو ایک ای میل میں کہا کہ ان کا محکمہ ایف بی آئی سینٹ لوئس کاؤنٹی پراسیکیوٹر آفس کی جانب سے اس حوالے سے کی جانے والی تحقیقات میں مکمل تعاون کر رہا ہے۔
وفاقی حکام اور سینٹ لوئس کاؤنٹی پراسیکیوٹر ویسلے بیل نے اخبار کے ساتھ اپنی تحقیقات پر کچھ بھی روشنی ڈالنے سے انکار کر دیا ہے۔
فیس بک پر پوسٹ کیے گئے پولیس بیان کے مطابق ، افسران کو صبح کے وقت کال موصول ہوئی کہ ایک شخص ووڈسن ٹیرس میں ایک دکان میں گھس گیا ہے۔ محکمہ نے لکھا کہ یہ شخص نشے میں تھا اور افسران کو دھمکیاں دیتا رہا ، اور انہوں نے اسے وارننگ جاری کی.
پاس میں ہی موجود ایک شخص نے اپنے سیل فون پر ویڈیو بنائی جس میں دکھایا گیا ہے کہ کتا اس آدمی کے پاؤں کو کاٹ رہا ہے اور وہ درد سے چیخ رہا ہے۔ کتے کا ٹرینر کچھ دیر بعد اسے پکڑتا ہے لیکن کاٹنے کا سلسلہ تقریبا 30 سیکنڈ تک جاری رہتا ہے۔
مظاہرین ووڈسن ٹیرس پولیس ڈیپارٹمنٹ کے باہر جمع ہوئے اور تینوں افسران کو ملازمت سے فارغ اور ان پر مقدمہ چلانے کا مطالبہ کیا۔