عثمان بزدار سے جہانگیرترین کے حامی اراکین کی ملاقات

128

لاہور(آن لائن)وزیر اعلی پنجاب عثمان بزدار سے جہانگیر ترین گروپ کے مزید اراکین پنجاب اسمبلی نے ملاقات کر کے ان کی قیادت پر اعتماد کا اظہار کیا ہے۔وزیراعلی پنجاب عثمان بزدار سے ترین گروپ کے نعمان لنگڑیال، خواجہ داود سلمانی اور عبد الحئی دستی نے ملاقات کی۔ذرائع کے مطابق ملاقات کرنے والے رہنماوں نے عثمان بزادر کی قیادت پر اعتماد کا اظہار کیا اور کہا کہ پارٹی اور اس کی قیادت کے ساتھ کھڑے ہیں۔رکن پنجاب اسمبلی نذیر چوہان پہلے ہی ترین گروپ سے علیحدگی اختیار کر چکے ہیں جبکہ سردار خرم لغاری نے بھی گزشتہ روز وزیراعلی عثمان بزدار سے ملاقات کی تھی۔ذرائع ایوان وزیر اعلی نے جہانگیر ترین گروپ کے مزید اراکین کی جانب سے بھی رابطوں کا دعوی کیا ہے۔ذرائع کا کہنا ہے کہ جلد ترین گروپ کے مزید اراکین وزیراعلی پنجاب سے ملاقات کریں گے۔