مظہر جبلپوری انٹر اکیڈمی ہاکی لیگ سیمی فائنل مرحلے میں داخل

88

کراچی ( اسٹاف رپورٹر) شعیب لائنز، تبسم پینتھرز ، صابر ٹائیگرز اور امتیاز ڈولفینز کی ٹیمیں مظہر جبلپوری انٹرا اکیڈمی سیون اے سائیڈ ہاکی لیگ کے سیمی فائنل مرحلے میں پہنچ گئیں، الصغیر ہاکی کلب کے زیر اہتمام منعقدہ لیگ مرحلے کے آخری روز صابر ٹائیگرز، تبسم پینتھرز اور امتیاز ڈولفینز کی کامیابی صابر ٹائیگرز کے اوکاشا نے ہیٹ ٹرک اسکور کی، انڈس اسٹیٹ اینڈ بلڈرز بحریہ ٹائون کے چیف ایگزیکٹو آفیسر ملک ارشد اور المخدوم ٹریڈرز کے مالک محمد توفیق مہمان خصوصی تھے، پاکستان انسٹیٹیوٹ آف ہاکی کے جنرل سیکریٹری رائو جاوید نے اعزازی مہمان کی حیثیت سے شرکت کی . اس موقع پر حاجی یونس صدیقی انٹرنیشنل گریڈ 1 امپائر اور نصرت حسین بھی موجود تھے۔ نارتھ کراچی سیکٹر الیون اے ہاکی اسٹیڈیم میں گزشتہ روز کھیلے گئے پہلے میچ میں صابر ٹائیگرز نے شعیب لائنز کو باآسانی ایک کے مقابلے میں تین گول سے شکست دیدی، فاتح ٹیم کی جانب سے اوکاشا نے تینوں گول اسکور کرکے ہیٹ ٹرک بنانے کا اعزاز حاصل کیا جبکہ شعیب لائنز کا واحد گول فرذاق نے اسکور کیا۔دوسرے میچ میں تبسیم پینتھرز نے عظیم فیلکنز کو 2-0 سے مات دیدی، گول محمد امسل اور ہر علی نے اسکور کیے. تیسرے میچ میں امتیاز ڈولفینز نے علی ایگلز کو 1-0 سے ہرادیا، میچ کا واحد گول حسن نے اسکور کیا. اس موقع پر مہمان خصوصی ملک ارشد نے اپنے خطاب میں کہا کہ الصغیر ہاکی کلب نے نارتھ کراچی میں قومی کھیل کو دوبارہ زندہ کردیا جب بھی اس گرائونڈ کو دیکھا تو کچرا کنڈی کی شکل میں دیکھا لیکن جب سے الصغیر کلب نے گرائونڈ کے انتظامات سنبھالے ہیں اب ادھر کچھ اور ہی تصویر نظر آرہی ہے موجودہ حالات میں کراچی کا یہ صف اول کا ہاکی کلب قومی کو کھیل کو زندہ رکھنے کیلیے جہاد کررہا ہے ہمارے ادارے کا ان سے تعاون جاری رہے گا، محمد توفیق نے کہا کہ اسٹیڈیم کی تزئین و آرائش اور نارتھ کراچی میں ہاکی کی بحالی کیلیے وہ بھی الصغیر ہاکی کلب کیساتھ کھڑے ہیں، نعیم حیدر نے کہا کہ کراچی میں قومی کھیل سید صغیر حسین کی بدولت زندہ ہے شہر قائد میں قومی کھیل کی سرگرمیوں کے حوالے سے جتنی خدمات اس کلب کی ہیں شاید ہی کسی اور کی ہوں حکومت کو بھی چاہیئے کہ وہ نارتھ کراچی میں ہاکی کے فروغِ کیلئے الصغیر کلب کا ساتھ دے، رائو جاوید نے کہا کہ الصغیر ہاکی کلب کراچی میں دیگر کلبز کیلئے زندہ اور جیتی جاگتی مثال ہے ۔ بعد ازاں مہمانوں کا تعرف کھلاڑیوں سے کروایا گیا اور انتظامیہ کی جانب سے مہمانوں کو گلدستہ اور اجرک تحفے میں پیش کیے۔ اس موقع پر صغیر حسین اور نارتھ کراچی ہاکی اکیڈمی کے ہیڈ کوچ مسرور جاوید نے مہمانوں کا شکریہ ادا کیا۔