سان فرانسسكو: واٹس ایپ نے عرصہ دراز سے کیے جانے والے عوامی مطالبے کو پورا کرتے ہوئے اب آف لائن واٹس ایپ فیچرز پر غور شروع کردیا ہے جبکہ ابتدائی اطلاعات کے مطابق اندرونی طور پر اس کی آزمائشی تحقیقات پر کام بھی جاری ہے۔
بین الاقوامی میگزین کے مطابق اورماہرین کا کہنا ہے کہ فی الحال واٹس ایپ فون سے جڑا ہوتا ہے اور اسی کی بدولت بھی ڈیسک ٹاپ ورژن کام کرتا ہے، یعنی فون بند ہوتے ہی یا فون کا انٹرنیٹ بند ہوتے ہی ڈیسک ٹاپ ورژن بھی بند ہوجاتا ہےلیکن اب واٹس ایپ کمپنی نے ایک بہت معنی خیز بات کی ہے کہ شاید فون کی بیٹری بند ہونے کی صورت میں بھی واٹس ایپ استعمال کرنا ممکن ہوگا۔
واٹس ایپ نے مزید کہا ہے کہ کل چار آلات (موبائل، مثلاً پی سی، لیپ ٹاپ اور ٹیبلٹ) پر ایک ساتھ واٹس ایپ چلانا ممکن ہوگا لیکن یہ طے ہے کہ اسے آزمائش کے طورپر واٹس ایپ کا بیٹا ورژن صرف چند افراد کے لیے ہی پیش کیا جائے گا جو استعمال کے بعد اس کی افادیت کا فیصلہ کریں گے اور ان تجربات کی روشنی میں آپشن کو مزید بہتر بنایا جاسکتا ہے۔
واضح رہے واٹس ایپ کے مطابق ایک سرے سے دوسرے سرے کی جانب اینکرپشن (خفیہ کاری) کی سہولت پہلے کی طرح موجود رہے گی جبکہ واٹس ایپ کے صارفین بار بار اس سہولت کا مطالبہ کررہے تھے جن کی مجموعی تعداد 2 ارب سے زائد ہے۔
خیال رہے فیس بک کے انجینئروں کے مطابق اس ضمن میں واٹس ایپ کے استعمال کو ازسرِنو دیکھا جارہا ہے اور اس کی وجہ یہ ہے کہ واٹس ایپ کا موجودہ ورژن کا مرکز اسمارٹ فون ہے اور عموماً اس پر کال کی جاتی ہیں اور اسی پر پیغامات بھیجے اور وصول کیے جاتے ہیں، اس طرح ڈیسک ٹاپ پر بھی فون کے اسکرین بطور آئینہ ہی دکھائی دیتا ہے۔
ماہرین کا کہنا ہے کہ اس میں کئی خامیاں ہیں کیونکہ واٹس ایپ ویب ایپ کا بار بار فون سے رابطہ منقطع ہوجاتا ہے لیکن نئے آپشن میں اس رکاوٹ کو دور کیا جائے گا اور اسمارٹ فون کی مرکزیت ختم ہوجائے گی، اس کے باوجود ڈیسک ٹاپ اور لیپ ٹاپ پر واٹس ایپ استعمال کرنا ممکن ہوگا۔
سائنسی تجزیہ کاروں نے کہا ہے کہ واٹس ایپ کو کثیرپلیٹ فارم پر منتقل کرنے سے لوگوں پر اس کے ذمے داری ختم ہوسکتی ہے، پھر بچے بھی اسے استعمال کرسکتے ہیں اور کسی نہ کسی طرح بچوں سے آن لائن غلط روابط کو فروغ مل سکتا ہے۔
