تاجکستان میں زلزلے سے تباہی‘ 5افراد جاں بحق

193
تاجکستان: طاقت ور زلزلے کے نتیجے میں مکانات کو شدید نقصان پہنچا ہے

دوشنبے (انٹرنیشنل ڈیسک) تاجکستان میں 5.9 شدت کے زلزلے نے وسیع پیمانے پر تباہی مچادی۔ خبررساں اداروں کے مطابق زلزلے کے جھٹکوں سے منہدم ہونے والی عمارتوں تلے دبنے سے 5 افراد ہلاک اور کئی زخمی ہوگئے۔ تاجکستان کے مشرقی ضلع راشت میں 5.9 شدت کا زلزلہ رونما ہوا ، زلزلے کا مرکز 165 کلومیٹر جنوب مغرب میں دارالحکومت دوشنبہ میں تھا جس کی گہرائی دو کلومیٹر تھی۔ زلزلے کے اثر سے درجنوں مکانات زمین بوس ہوگئے اور کئی علاقوں میں بجلی کا نظام درہم برہم ہوگیا۔ مکانات کے ملبے سے 5 افراد کی لاشیں نکالی گئی ہیں، جب کہ اسپتالوں میں ایمرجنسی نافذ کردی گئی۔ امدادی ٹیموں نے ملبے تلے دبے زخمیوں کو قریبی اسپتالوں میں منتقل کیا، جب کہ بے گھر ہونے والے افراد کے لیے ریلیف کیمپ قائم کیے گئے ہیں۔ متاثرین کو کھانا اور دیگر ضروری اشیا فراہم کی جارہی ہیں۔ متعلقہ حکام کا کہنا ہے کہ زلزلے کے جھٹکوں کے بعد آفٹر شاکس کا سلسلہ جاری رہے گا جس کے باعث پہاڑی علاقوں میں مقیم افراد کو محفوظ مقام کو منتقل کردیا گیا ہے۔ دوسری جانب انڈونیشیا کے جزیرے سولا ویسی کے کھلے سمندر میں بھی 6.2 کی شدت کا زلزلہ آیا۔