راولپنڈی: خاتون ٹیچر سے بے دردی سے پرس چھیننے والا ملزم گرفتار

312

راولپنڈی: شہر کے علاقے ڈھوک چوہدریاں میں بے دردی سے خاتون ٹیچر سے پرس اسنیچنگ کی واردات کرنے والے ملزم انیس اقبال کو پولیس نے گرفتار کرلیا ہے۔

راولپنڈی شہر میں تھانہ ریس کورس کی حدود میں موٹر سائیکل سوار نے راہ چلتی اسکول ٹیچر سے اس بے دردی سے پرس چھینا کہ اسکول ٹیچر گر کر زخمی ہوگئی۔ واقعے کی ویڈیو سوشل میڈیا پر وائرل ہوگئی۔ سی پی او محمد احسن یونس نے واقعہ کا نوٹس لیتے ہوئے ملزم کی فوری گرفتاری کے احکامات دیے تھے۔

ویڈیو فوٹیج میں دیکھا جاسکتا ہے کہ خاتون اسکول ٹیچر گلی سے گزر رہی ہے کہ اس دوران فیس ماسک پہنے نامعلوم موٹرسائیکل اس بے دردی سے ٹیچر سے بیگ چھینا کہ وہ منہ کے بل سڑک پر جا گری اور زخمی ہوگئی، اور راہزن فرار ہوگیا۔ اسنیچنگ کے دوران ٹیچر کا موبائل وغیرہ بھی گرتے ہوئے دیکھا جاسکتا ہے۔ اس دوران چند راہ گیر بھی گلی میں پہنچ کر ٹیچر کی مدد کرتے ہیں۔

تھانی ریس کورس میں خاتون ٹیچر کے بھائی کی مدعیت میں واقعے کا مقدمہ درج کرکے پولیس نے ملزم انیس اقبال کو گرفتار کرلیا ہے۔ پولیس کا کہنا ہے کہ دوران گرفتاری ملزم نے پولیس پر فائرنگ کی کوشش کی جس دوران ملزم کے اپنے ہی پستول سے نکلی گولی دائیں کلائی پر لگی۔ملزم کے قبضے سے چھینی گئی رقم اور پرس بھی برآمد کرلیا گیا۔