امریکی صدر جوبائیڈن نے ٹک ٹاک اور وی چیٹ پر پابندی لگانے سے متعلق ٹرمپ کا فیصلہ واپس لے لیا۔
غیر ملکی خبر ایجنسی کے مطابق امریکی صدر جو بائیڈن نے چینی موبائل ایپ ٹک ٹاک اور وی چیٹ پر عائد پابندی اٹھا لی ہے۔
سابق صدر ڈونلڈ ٹرمپ نے قومی سلامتی کے لیے خطرہ بتاتے ہوئے ان پر پابندی عائد کرنے کے لیے حکم نامہ جاری کیا تھا۔ ٹرمپ انتظامیہ کا کہنا تھا کہ چینی حکومت ان ایپ کی مدد سے ڈیٹا کی تفصیلات حاصل کر سکتی ہے اس لیے یہ ملک کی قومی سلامتی کے لیے یہ خطرہ ہیں۔
چین کی جانب سے جوبائیڈن کے فیصلہ کا خیر مقدم کرتے ہوئے کہا گیا ہے کہ ٹک ٹاک پر عائد پابندی ختم کرنےکا فیصلہ خوش آئند اور درست جانب قدم ہے۔
چین کے خلاف سفارتی و اقتصادی کشیدگی بڑھنے پر ڈونلڈ ٹرمپ نے چینی موبائل ایپس پر پابندی عائد کی تھی تاہم جوبائیڈن کے اقتدار میں آنے کے بعد ان ایپس کے خلاف قانونی کارروائی روک دی گئی تھی۔