بیلجیئم میں اسکول کی عمارت منہدم، 5 افراد ہلاک، 9 زخمی

127

برسلز: بیلجیئم میں اسکول کی زیر تعمیر عمارت اچانک منہدم ہوگئی، جس کے ملبے تلے دب کر 5 مزدور ہلاک جب کہ 9 شدید زخمی ہوگئے۔

عالمی خبر رساں ادارے کے مطابق بیلجیئم کے شہر انتورپن میں اسکول کی عمارت میں تعمیراتی کام جاری تھا، کہ اس دوران عمارت اچانک بیٹھ گئی، جس کے نتیجے میں 14 مزدور عمارت کے ملبے تلے دب گئے۔

ریسکیو اداروں نے امدادی کاموں کا آغاز کرتے ہوئے ملبے سے 5 لاشیں نکالی ہے جب کہ 9 افراد زخمی ہیں جن میں سے 3 افراد کی حالت نازک ہے۔

حکام کے مطابق حادثہ جلد بازی کی وجہ سے پیش آیا، اسکول کو کورونا وبا کے بعد نئے تعلیمی سال کے آغاز پر یکم ستمبر سے کھلنا تھا جس کے لیے مزدوروں پر عمارت کی تعمیر کا کام جلد از جلد مکمل کرنے کے لیے دباؤ تھا۔