دنیا کا سب سے بدقسمت دکھائی دینے والا پرندہ کون سا ہے؟

483

کینبرا: آسٹریلوی پرندوں کا یہ خاندان اپنی عجیب و غریب شکل و شباہت کی بناء پر فراگ ماؤتھ (مینڈک جیسے منہ والا) کہلاتا ہے جسے سائنسدانوں نے انسٹاگرام کا مقبول ترین پرندہ قرار دیا ہے۔

ماہرین کا کہنا ہے کہ اس خاندان سے تعلق رکھنے والے پرندوں کا شمار دنیا کے سب سے بدصورت پرندوں میں کیا جاتا ہے جبکہ 2004 میں شائع ہونے والی ایک تحقیق میں فراگ ماؤتھ کو دنیا کا سب سے بدقسمت دکھائی دینے والا پرندہ بھی قرار دیا گیا تھا۔

سوشل میڈیا پر جانوروں کی تصاویر کے حوالے سے ہونے والی ایک تازہ تحقیق میں انکشاف ہوا ہے کہ پرندوں کا یہی خاندان انسٹا گرام پر سب سے زیادہ پسندیدہ بھی ہے، تاہم اس کا مطلب ہر گز یہ نہیں کہ فراگ ماؤتھ کی زیادہ تصویریں انسٹاگرام پر اپ لوڈ کی گئی ہیں بلکہ پرندوں کی 27 ہزار میں سے صرف 65 تصویریں ان پرندوں کی ہیں۔

خیال رہے فراگ ماؤتھ کی ہر تصویر کو ملنے والے لائکس اور کمنٹس کی تعداد دوسرے پرندوں کی تصویروں کے مقابلے میں کئی گنا زیادہ ہیں۔

ماہرین نے اس مقصد کے لیے پرندوں کی تصاویر شیئر کرنے والے، ایسے 9 انسٹاگرام اکاؤنٹس کا جائزہ لیا جن کے فالوورز کی تعداد سب سے زیادہ، اور مجموعی طور پر 35 لاکھ تھی۔

انہیں یہ جان کر حیرت ہوئی کہ فراگ ماؤتھ پرندوں کی ہر تصویر کو دوسرے پرندوں کے مقابلے میں کہیں زیادہ لائکس ملے تھے اور ان پر کمنٹس بھی زیادہ کیے گئے تھے۔

ماہرین کا کہناہےکہ شاید فراگ ماؤتھ کا دوسرے پرندوں سے بہت مختلف اور منفرد ہونا ہی اس کی وجہ ہے کیونکہ لوگ معمول سے ہٹ کر چیزوں کو بہت پسند کرتے ہیں جبکہ وجہ کچھ بھی ہو لیکن اتنا ضرور طے ہےکہ فراگ ماؤتھ پرندوں کو انسٹاگرام پر ‘پسندیدہ ترین پرندوں’ کا اعزاز حاصل ہوچکا ہے۔