سعودی عرب کے وزیر برائے مذہبی امور الشیخ ڈاکٹر عبداللطیف آل الشیخ نے کہا ہے کہ ماہ صیام کے باقی ایام میں وباء کے پیش نظر عبادت کے اوقات کو محدود کرنے کا کہا گیا ہے۔
انہوں نے کہا کہ مملکت کی مساجد میں تراویح کے بعد قیام اللیل کی نماز 30 منٹ سے زیادہ نہیں ہونی چاہیے۔
ان کا کہنا تھا کہ وبا کی وجہ سے شہریوں کو ہدایت کی جاتی ہے کہ وہ ماہ صیام کے بقیہ دنوں میں مساجد میں اجتماعی عبادت کو مختصر رکھیں تاکہ وبا کو پھیلنے سے روکا جا سکے جبکہ سعودی عرب کی وزارت صحت نے کورونا وبا کے حوالے سے آنے والے دن زیادہ اہم اور خطرناک قرار دیتے ہوئے شہریوں کو ہدایت کی ہے کہ وہ وبا کی روک تھام کے لیے حکومت کے وضع کردہ ضابطہ اخلاق کی سختی سے پابندی کریں۔
میڈیا رپورٹس کے مطابق وزارت صحت نے شہریوں کو خبردار کیا ہے کہ عیدالفطر کے ایام افسوس کے دنوں میں نہیں بدلنے چاہئیں، اس کے لیے ضروری ہے کہ شہری کورونا ایس او پیز پر سختی کے ساتھ عمل کریں۔
سعودی عرب کی وزارت صحت کے ترجمان ڈاکٹر محمد العبد العالی نے ایک پریس کانفرنس کے دوران کہا کہ ہم اس وقت کو کنٹرول کرنے کے لیے تمام تر کوششیں بروئے کار لاتے ہوئے وبا کو کم کرنے کی کوشش کر رہے ہیں اور آنے والے دن بالخصوص عید کے ایام زیادہ حساس اور اہم ہیں۔
