کراچی(اسٹاف رپورٹر)کراچی گرین لائن ٹرانسپورٹ منصوبے کے لئے پروٹو ٹائپ بس چائنہ میں تیار کر لی گئی. انسپیکشن منظوری کے بعد 80 بسوں کی تعمیر شروع ہو جائے گی اور جولائی کے آخر یا اگست کے شروع میں یہ بسیں کراچی پہنچ جائیں گی۔
وفاقی وزیر منصوبہ بندی و ترقی اسد عمر نے سماجی رابطے کی ویب سائٹ اپنے ٹوئٹر اکاؤنٹ پر بس کی تصویر شیئر کرتے ہوئے کہا کہ گرین لائن ٹرانسپورٹ منصوبے کے لیے پروٹو ٹائپ بس چائنہ میں تیار کر لی گئی ہے۔
اسد عمر نے کہا کہ انسپیکشن اور منظوری کے بعد 80 بسوں کی تعمیر شروع ہوجائے گی اور جولائی کے آخر یا اگست کے شروع میں بسیں کراچی پہنچیں گی۔
وفاقی حکومت کی جانب سے جون 2021 تک گرین لائن بحال کرنے کا اعلان کیا گیا تھا، جب کہ 12 جون 2020 کو بسیں خریدنے کی اجازت جاری کی گئی تھی، گرین لائن کا پورا منصوبہ 24 ارب روپے کی لاگت سے تیار ہونا ہے۔
منصوبے کے تحت پہلے مرحلے میں سرجانی سے نمائش تک 200 سے 250 افراد کی گنجائش والی 80 بسیں چلیں گی۔تاخیر کے شکار اس منصوبے کی تکمیل سے متعلق وفاقی وزراء الگ الگ تاریخ کا کرتے رہے ہیں حال ہی میں گورنر سندھ عمران اسماعیل نے اعلان کیا ہے کہ گرین لائن منصوبہ کا افتتاح 14 اگست کو کیا جائے گا۔
