12 گھنٹے کی شفٹ میں کام کرنے کے بعد اسپتال کے فرش پر سو رہے والد کی ایک تصویر وائرل ہوگئی ہے جس کو اب تک 32،000 بار شیئر کیا جاچکا ہے۔
میسوری کے فریڈرک ٹاؤن سے تعلق رکھنے والی سارہ ڈنکن نے اسپتال کے فرش پر سوتے ہوئے اپنے شوہر جو ڈنکن کی تصویر اُس وقت پوسٹ کی جب دونوں نے اپنی چھوٹی بچی کو ایمرجنسی میں داخل کرایا تھا۔
سارہ ڈنکن نے گڈ مارننگ امریکہ سے گفتگو کرتے ہوئے کہا کہ میں نے اپنے دل کی گہرائیوں سے اپنے شوہر کی یہ پوسٹ شیئر کی کیونکہ میں جانتی ہوں کہ میں اس سے اس بات کا اظہار نہیں کرپاتی کہ میں اُس کی بحیثیت شوہر اور باپ کے دی گئی قربانیوں کی کتنی مشکور ہوں۔
سیمنٹ تیار کرنے والی ایک فیکٹری میں جو ڈنکن نے 23 مارچ کو 12 گھنٹے کی شفٹ کے بعد کام ختم کیا تھا۔ جب وہ گھر آئے تو اُن کی اہلیہ نے انہیں بتایا کہ وہ اپنی بیٹی کو اسپتال لے جارہی ہے کیوں کہ اُس کی طبیعت ٹھیک نہیں ہے۔