اسلام آباد:سپریم کورٹ کے جج جسٹس قاضی فائز عیسی کی اہلیہ سرینا عیسی نے وفاقی وزیر فواد چوہدری کیخلاف توہین عدالت کی درخواست دائر کردی۔
تفصیلات کے مطابق سرینا عیسی ٰنے توہین عدالت کی درخواست سپریم کورٹ میں دائر کی، انہوں نے یہ درخواست فواد چوہدری کی جانب سے دو روز قبل جسٹس قاضی فائز عیسی کے حوالےسے کے گئے ٹوئٹ پر دائرکی۔ درخواست میں سرینا عیسٰی نے استدعا کی ہے کہ فواد چوہدری کےخلاف توہین عدالت کی کارروائی کی جائے، فواد چوہدری نے جسٹس فائز عیسٰی کو ‘انڈر ٹرائل جج’ کہہ کر توہین عدالت کی ہے۔
سرینا عیسٰی کا کہنا ہےکہ فواد چوہدری کا بیان ظاہر کرتا ہےکہ حکومت نے عدالت میں خفیہ کیمرے لگا رکھے ہیں،حکومت جاسوسی کر رہی ہے اور کیس کی سماعت براہ راست دکھائے جانےکی مخالف ہے۔ درخواست میں استدعا کی گئی ہے کہ فواد چوہدری کا ٹوئٹر اکاؤنٹ بلاک کیا جائے،فواد چوہدری کو اپنےحلف کی خلاف ورزی پر عہدے سے فارغ کیا جائے۔
ایک ہفتے سے سپریم کورٹ کے ایک انڈر ٹرائیل جج کی تقریریں سن رہے ہیں اگر جواب دیا تو دکھ ہوا سے توہین ہوگئ کے بھاشن آجائیں گے محترم اگر اپ کو بھی اپنے گاڈ فادر افتخار چوہدری کی طرح سیاست کاشوق ہے تو مستعفیٰ ہو کر کونسلر کا الیکشن لڑ لیں مقبولیت اور قبولیت دونوں کا اندازہ ہو جائیگا
— Ch Fawad Hussain (@fawadchaudhry) March 19, 2021
خیال رہے کہ گزشتہ دنوں وفاقی وزیر سائنس اینڈ ٹیکنالوجی فواد چوہدری نے سپریم کورٹ کے جج جسٹس قاضی فائز عیسی کو تنقید کا نشانہ بنایا تھا۔ انہوں نے سماجی رابطے کی ویب سائٹ پر ٹویٹ کرتے ہوئے کہا تھا کہ ایک ہفتے سے سپریم کورٹ کے ایک انڈر ٹرائل جج کی تقریریں سن رہے ہیں، اگر جواب دیا تو دکھ ہوا سے توہین ہوگئی کے بھاشن آجائیں گے۔
ان کا کہنا تھا کہ محترم اگر اپ کو بھی اپنے گاڈ فادر افتخار چوہدری کی طرح سیاست کاشوق ہے تو مستعفیٰ ہو کر کونسلر کا الیکشن لڑ لیں مقبولیت اور قبولیت دونوں کا اندازہ ہو جائیگا۔