کراچی (اسٹاف رپورٹر)مجلس وحدت مسلمین سندھ کے صوبائی ترجمان علامہ مبشر حسن زیدی نے دودھ کی قیمتوں میں اضافے کو مسترد کرتے ہوئے اسے عوام کے ساتھ ظلم قرار دیا ہے۔انہوں نے کہا ہے کہ عوام پہلے ہی مہنگائی کی چکی میں پس رہے ہیں۔اشیائے خورو نوش، پیٹرولیم مصنوعات اور بجلی کی قیمتوں میں آئے روزنت نئے اضافے نے عوام کی کمر توڑ کر رکھ دی ہے۔صوبائی و وفاقی حکومتوں کے مابین اختیارات کی کھینچا تانی اور سیاسی چپقلش نے انہیں عوامی مسائل سے غافل کر رکھا ہے۔عوام کی مشکلات پر توجہ دینے کے بجائے اپوزیشن اپنے اثاثے اور حکومت اپنا اقتدار بچانے میں اپنی ساری قوت صرف کر رہی ہے۔عوام کے نام پر اقتدار حاصل کرنے والوں نے آج عوام پر زندگی تنگ کر دی ہے۔انہوں نے حکومت سے مطالبہ کیا ہے کہ وہ انتظامی معاملات پر اپنی گرفت مضبوط کرے۔تاجر طبقہ اور عوام طویل لاک ڈاؤن کے بعد پہلے ہی شدید مشکلات کا شکار ہیں۔ معاشی مسائل اور بے روزگاری میں روز بروز اضافہ ہوتا جا رہا ہے۔ایسی صورتحال میں چاہیے تو یہ تھا کہ عوام کو ریلیف فراہم کیا جاتا لیکن اس کے برعکس عوام کو ان سرمایہ داروں کے رحم و کرم پر چھوڑ دیا گیا ہے جنہوں نے مافیا کی شکل میں ہر کاروبار میں اپنے پنجے گاڑے ہوئے ہیں۔عام اشیائے خورونوش، سبزی اور پھلوں سمیت دیگر ضروریات زندگی کی من پسند داموں فروخت انتظامی معاملات سے حکومت کی عدم دلچسپی کا بین ثبوت ہے۔ روزمرہ استعمال کی اشیا کو مہنگے داموں فروخت کرنے والوں کے خلاف سخت ترین کارروائی ہونی چاہیے۔انہوں نے کہا دودھ کی قیمتوں میں اضافے کا فیصلہ فوری طور پر واپس لیا جائے۔
