جب سے وزیراعظم عمران خان نے قومی اسمبلی کے اجلاس میں اراکین سے اعتماد کا ووٹ لینے کا فیصلہ کیا ہے تب سے لوگوں کے ذہنوں میں یہی سوال آرہا ہے کہ اعتماد کا ووٹ لیتے کس طرح ہیں؟
پارلیمنٹ سے اعتماد کا ووٹ لینے کا طریقہ کار یہ ہے کہ سب سے پہلے اراکین اسمبلی کی موجودگی کو یقینی بنانے کے لیے ایوان میں 5 منٹ تک گھنٹی بجائی جاتی ہے۔ گھنٹی بجانے کے بعدلابی کی طرف جانے والے دروازے بند کر دیے جاتے ہیں پھر کسی کوایوان میں آنے جانے کی اجازت نہیں ہوتی۔
اس کے بعد اسپیکر اسمبلی کے سامنے وزیراعظم پر اعتماد سے متعلق قرارداد پڑھی جاتی ہے۔ جو ارکان قرارداد کے حق میں ووٹ ڈالنا چاہتے ہیں وہ قطار میں داخلی راستے کی جانب جاتے ہیں۔ داخلی راستے پر ممبر کا ووٹ ریکارڈ کرنے کے لیے ٹیلرز یعنی اسمبلی اہلکار موجود ہوتے ہیں۔
ہر ممبر ٹیلر کی میز پر پہنچنے پر قواعد کے تحت الاٹ کردہ ڈویژن نمبر پکارے گا۔ ٹیلر ممبر کا نام پکارتے ہوئے ڈویژن لسٹ سے اس کا نام کاٹ دے گا۔ ممبر کو رُک کر واضح طور پر اپنا نام سننا ہوگا تاکہ ووٹ کو صحیح طرح سے ریکارڈ کیا جا سکے۔
اپنے ووٹ کے اندراج کے بعد ممبر پارلیمان کو لازمی طور پر چیمبر چھوڑنا ہوگا۔ ارکان کی واپسی اس وقت تک نہیں ہو سکتی جب تک ایک بار پھر گھنٹیاں نہ بجیں۔ جب اسپیکر کو معلوم ہو جائے گا ارکان ووٹ درج کروا چکے تو اعلان کرے گا کہ ووٹنگ ختم ہوگئی۔
سیکریٹری قومی اسمبلی ڈویژن کی فہرستوں کو جمع کرے گا، درج ووٹوں کی گنتی کرے گا۔ سیکریٹری قومی اسمبلی نتیجہ اسپیکر کے سامنے پیش کرے گا۔ ارکان کوواپس بلانے کے لیےپھر سے دو منٹ تک گھنٹی بجے گی۔
ارکان کی واپسی کے بعد ا سپیکر نتائج کا اعلان کرے گا۔ اسپیکر صدر کو قرارداد منظور یا مسترد ہونے سے متعلق تحریری طور پر آگاہ کرے گا۔ سیکریٹری کے لیے ضروری ہے کہ وہ نتائج کا نوٹی فکیشن گزٹ آف پاکستان میں شائع کروائے۔
