لاہور( نمائندہ جسارت) نائب امیر جماعت اسلامی پاکستان راشد نسیم نے کہاہے کہ ملک کو دیانتدار اور صالح قیادت کی ضرورت ہے جو اس کی کشتی کو بھنور سے نکال سکے ۔ ہاورڈ اور آکسفورڈ سے تعلیم یافتہ لوگوں نے ملک کی معیشت کو تباہ اور قوم کو عالمی مالیاتی اداروں کی غلامی میں دیا ۔ پاکستان مزید ان لوگوں کا متحمل نہیں ہوسکتا ۔ اسلامی ذہن کے لوگوں کو آگے لانا چاہیے ۔ جماعت اسلامی اس کے لیے تربیت سازی کر رہی ہے ۔ ان خیالات کا اظہار انہوںنے منصورہ میں اپنی صدارت میں ہونے والے شعبہ تربیت کے اجلاس سے خطاب کرتے ہوئے کیا ۔ راشد نسیم نے کہاکہ جماعت اسلامی سالہا سال سے منصورہ اور دیگر شہروں میں تربیتی ورکشاپس کا انعقاد کر رہی ہے جس کا مقصد فرد کی اصلاح ہے ۔ جماعت اسلامی فرد اورمعاشرے کی اصلاح چاہتی ہے ۔ ہم اسلامی انقلاب کے خواہاں ہیں ۔ انہوں نے کہاکہ قوم سالہا سال سے کرپٹ سرمایہ دارانہ نظام کو بھگت رہی ہے ۔ ملک کو اسلامی معیشت کی ضرورت ہے ۔ انہوںنے کہاکہ امانت دار لوگ آگے آئیں گے تو پاکستان پٹڑی پر چڑھے گا اور قوم استعمار کی غلامی سے آزاد ہوگی ۔ اجلاس میں جماعت اسلامی کے رہنما سید وقاص جعفری ، اظہر اقبال حسن ، ڈاکٹر ظفر الٰہی ، حافظ اسرار اور مولانا احسان اللہ بھی شریک تھے ۔
