کراچی: عدالت نے لیاری گینگ وار کے سرغنہ عذیر جان بلوچ کو بغدادی تھانے پر حملے کے مقدمے میں عدم شواہد کی بنا پر بری کردیا ہے جس کے وہ اب تک 9 مقدمات میں بری ہوچکا ہے۔
کراچی سینٹرل جیل جوڈیشل کمپلیکس میں ایڈیشنل ڈسٹرکٹ اینڈ سیشن جج جنوبی نے عذیر بلوچ کیخلاف بغدادی تھانے پر حملے کے مقدمے کا فیصلہ سنادیا۔ عدالت نے عدم شواہد کی بنا پر گینگ وار کے سرغنہ عذیر جان بلوچ کو بری کردیا۔
دوران سماعت عدالت نے تفتیشی افسر سے استفسار کیا تھا کہ آپ کو کیسے پتہ چلا کہ عذیر جان بلوچ کی ایما پر حملہ کیا گیا گیا تھا۔ جس پر تفتیشی افسر نے بتایا تھا کہ وہاں موجود محلے والوں نے بتایا تھا۔ جس پر عدالت نے استفسار کیا تھا کہ آپ نے محلے والوں کو گواہ بنایا تھا؟۔
تفتیشی افسر نے جواب میں کہا تھا نہیں محلے والوں میں سے کسی کو گواہ نہیں بنایا تھا۔ پولیس کے مطابق عذیر جان بلوچ کی ایما پر بغدادی تھانے پر حملہ کیا گیا تھا۔ عذیر بلوچ کیخلاف بغدادی تھانے پر حملے کا مقدمہ 2012میں درج کیا گیا تھا۔
واضح رہے کہ عذیر جان بلوچ اب تک 9مقدمات میں بری ہوچکا ہے۔
