اقوام متحدہ میں ایران کے سفیر ماجد تخت راونچی نے کہا ہے کہ اسلامی جمہوریہ ایران کسی بھی حملے کے خلاف اپنا دفاع کرنے میں دریغ نہیں کرے گی اور اس کی قومی سلامتی کو لاحق کسی بھی خطرے کا بھرپور جواب دیا جائے گا۔
غیر ملکی نیوز ایجنسی کے مطابق ایرانی سفارت کار نے اسرائیلی چیف آف اسٹاف ، لیفٹیننٹ جنرل اییوو کوچاوی کے تبصرے کا حوالہ دیا جس میں انہوں نے کہا تھا کہ اسرائیل ایرانی جوہری پلانٹس کو نشانہ بنانے کے اپنے عملی منصوبوں کو تازہ دم کررہا ہے۔
اسرائیلی جنرل کے تبصرے پر ردعمل دیتے ہوئے راونچی نے کہا کہ اسرائیل یہ دعوی کرکے ایرانی جوہری پروگرام کے بارے میں جھوٹ پھیلارہا ہے اور اس سے مشرق وسطی کو خطرہ لاحق ہے۔ انہوں نے اصرار کیا کہ یہ مقبوضہ ریاست کے اپنے جوہری ہتھیاروں سے توجہ ہٹانا ہے جو واقعتاً پورے خطے کے استحکام کو خطرہ میں ڈال رہا ہے۔
راونچی نے عالمی برادری سے مطالبہ کیا کہ وہ اسرائیل کے اس طرح کے خطرات کے مقابلہ میں اپنی ذمہ داریوں کو نبھائے۔