ترکی کی مثبت پیشرفت، یورپی یونین کا پابندیاں عائد کرنے کا فیصلہ موخر

181

یوروپی یونین نے ترکی میں ہونے والی مثبت پیشرفت کی وجہ سے ترکی پر ممکنہ پابندیاں عائد کرنے میں تاخیر کا فیصلہ کیا ہے۔

یوروپی یونین کے اعلی نمائندے جوزیف بوریل نے پریس ریمارکس میں کہا کہ ہم نے ترکی کے ساتھ اپنے تعلقات کے تمام پہلوؤں پر تبادلہ خیال کیا جس میں دسمبر میں ہونے والے کونسل کے اختتامی نتائج کی نشاندہی کی گئی۔

انہوں نے کہا کہ ہم نے ترک حکام کے یورپی یونین کونسل کو بھیجے گئے اہم پیغامات کا نوٹس لیا۔ ہم اپنی بات چیت اور تعاون کو آگے بڑھانے اور مستحکم کرنے کے لئے ترکی کے ساتھ تعاون کی اہمیت کی تصدیق کرتے ہیں۔

یوروپی یونین کے اجلاس کے بعد جرمن وزیر خارجہ ہیکو ماس کا کہنا تھا کہ ہم نے آج ترکی پر پابندیاں عائد نہ کرنے کا فیصلہ کیا ہے کیونکہ ہم دیکھ رہے ہیں کہ مثبت پیشرفت ہو رہی ہے۔ مشرقی بحیرہ روم کے علاقوں میں اب ترکی کے جہاز موجود نہیں ہیں۔ ترکی اور یونان کے مابین مذاکرات استنبول میں شروع ہوگئے ہیں۔ یہ تمام مثبت اشارے ہیں جن کا ہم نے طویل عرصے سے انتظار کیا تھا جسے اب پابندیوں کے ذریعہ تنگ نہیں کیا جانا چاہئے۔