ٹوکیو(جسارت نیوز) سال 2020میں ہونے والے ٹوکیو اولمپکس کی نئی تاریخ طے کرلی گئی، اولمپک گیمز اب جولائی 2021میں ہوں گے۔ بین الاقوامی ویب سائٹ کے مطابق انٹرنیشنل اولمپک کمیٹی (آئی او سی)کے سربراہ تھامس باخ نے ایک انٹرویو میں کہا ہے کہ کرونا وائرس کی وجہ سے تاخیر کا شکار ہونے والے ٹوکیو اولمپکس رواں سال موسم گرما میں منعقد ہوں گے، اور اس حوالے سے کوئی پلان بی نہیں ہے۔آئی او سی کے سربراہ کا کہنا تھا کہ ہم ان کھیلوں کو محفوظ اور کامیاب بنانے کے لیے پوری طرح پرعزم ہیں۔دوسری جانب جاپان میں اولمپکس کے انعقاد کے حوالے سے عوامی حمایت میں کمی آئی ہے۔ ایک حالیہ پول کے مطابق 80فیصد سے زائد افراد کا کہنا ہے کہ گیمز کو منسوخ یا دوبارہ سے ملتوی کر دینا چاہیے۔ٹوکیو اولمپکس کے سی ای او توشیرو موتو کا کہنا ہے کہ منتظمین اس موسم گرما میں کھیلوں کا انعقاد کروانے کے لیے پرعزم دکھائی دیے اور ایونٹ کی منسوخی پر بات نہیں کی گئی۔تاہم انہوں نے تسلیم کیا کہ وہ اس بات کی ضمانت نہیں دے سکتے کہ اسٹینڈ تماشائیوں سے بھرے ہوں گے یا تماشائیوں کے بغیر ہوں گے۔رواں موسم بہار میں اس حوالے سے فیصلہ ہوگا کہ آیا غیر ملکی شائقین ٹوکیو اولمپکس میں شرکت کرنے کے اہل ہوں گے، اور کتنے تماشائیوں کو ان کھیلوں کے مقابلے دیکھنے کی اجازت دی جائے گی۔یاد رہے کہ ٹوکیو اولمپکس مارچ 2020 میں ہونے والے تھے جسے کرونا وائرس کے پھیلا کے باعثملتوی کر کے اگست میں منعقد کرنے کا اعلان کیا گیا تاہم اس وقت بھی ایونٹ کا انعقاد نہیں ہوسکا۔اب ٹوکیو اولمپکس کی نئی تاریخ 23 جولائی تا 8 اگست 2021رکھی گئی ہے۔
