بجلی نرخ میں اضافے سے مہنگائی بڑھے گی ، شرح سود 7 فیصد برقرار ، اسٹیٹ بینک مانیٹری پالیسی کا اعلان

168

 

کراچی(اسٹاف رپورٹر)بجلی نرخ میں اضافے سے مہنگائی بڑھے گی ، شرح سود 7فیصد برقرار ، اسٹیٹ بینک کامانیٹری پالیسی کا اعلان۔ جمعہ کی شام کراچی میں
پریس کانفرنس کر تے ہوئے گورنر اسٹیٹ بینک رضا باقر نے کہا کہ آنے والے دنوں میں مانیٹری پالیسی اسی سطح پر رہے گی، اگر ضرورت ہوئی تو شرح سود مناسب طریقے سے بڑھائیں گے، مہنگائی کی شرح 7 سے 9 فیصد رہنے کا امکان ہے۔انہوں نے کہا کہ ملکی معاشی حالات بہتر ہو رہے ہیں، ابھی وہ بہتری نہیں آئی جو دیکھنا چاہتے ہیں، مہنگائی کو کنٹرول رکھنے کے لیے شرح سود برقرار رکھنے کا فیصلہ کیا ہے۔ان کا کہنا تھا کہ اس مہنگائی میں بجلی یا بین الاقوامی تیل کی قیمتوں میں اضافہ ہوتو یہ عارضی ہے اورغذائی اشیا کی مہنگائی بھی عارضی تھا، اس لیے کمیٹی کا خیال تھا کہ ان کی وجہ سے شرح سود میں تبدیلی کی ضرورت نہیں ہے، بجلی کے نرخ بڑھنے سے مہنگائی بڑھنے کا خدشہ ہے۔انہوں نے کہا کہ مانیٹری پالیسی کمیٹی کا خیال تھا کہ طلب میں دباؤ نہیں ہے کیونکہ ہماری صلاحیت مکمل طور پر زیر استعمال نہیں اور مہنگائی کی پیش گوئی میں توازن ہے۔رضا باقر نے کہا کہ ان ساری وجوہات کی وجہ سے مانیٹری پالیسی کمیٹی کو معاشی حالت پر نظر رکھنا چاہیے، اس پر نکتہ نظر تھا کہ پہلے کے مقابلے میں حالات بہتر ہو رہے ہیں، کووڈ سے پہلے کے مقابلے میں حالات میں بہتری آئی ہے لیکن قوم کی توقعات کے مطابق اب بھی نہیں ہیں۔