براڈشیٹ معاملہ: حکومت نے جسٹس (ر) عظمت شیخ کی سربراہی میں کمیٹی بنادی

144

اسلام آباد: حکومت نے براڈ شیٹ معاملے کی تحیقیقات کیلئے سپریم کورٹ کے ریٹائرڈ جج جسٹس (ر) عظمت سعید شیخ کو انکوائری کمیٹی کا سربراہ مقرر کردیا ہے۔

وفاقی وزیر اطلاعات نے سماجی رابطوں کی ویب سائٹ ٹوئٹر پر جسٹس (ر) عظمت سعید شیخ کو انکوائری کمیٹی کا سربراہ مقرر کرنے کا اعلان کیا۔ انہوں نے کہا کہ قوم کو پتہ چلنا چاہیے الف سے یہ تک کیا ہوا، کمیٹی مجاز ہے کسی کو بھی طلب کرسکتی ہے، کمیٹی 45 دنوں میں کام مکمل کرے گی،انکوائری کے نتیجے میں تمام سوالات کے جواب ملیں گے،ہمیں اپنے پیسے سے غرض ہے کہ ہمارا پیسہ گیا کیوں۔

دوسری جانب وفاقی وزیر سائنس و ٹیکنالوجی فواد چودھری نے بھی ٹوئٹ کرتے ہوئے بتایا کہ وزیر اعظم عمران خان نے جسٹس ریٹائرڈ عظمت سعید کو براڈشیٹ انکوائری کمیٹی کا سربراہ مقرر کردیا ہے، جبکہ کمیٹی کے باقی ممبران کا تقرر جسٹس عظمت سعید کی مشاورت سے کیا جائیگا۔

خیال رہے کہ غیر ملکی اثاثہ جات ریکوری فرم براڈ شیٹ کے ثالثی دستاویز اور کمپنی کے چیف ایگزیکٹو آفیسر (سی ای او) کاوے موسوی کے دیے گئے بیانات سے پاکستان میں ایک نیا تنازع اٹھ کھڑا ہوا ہے۔ حکومت اور اپوزیشن جماعت مسلم لیگ ن کی جانب سے ایک دوسرے پر الزامات عائد کیے جا رہے ہیں۔

وفاقی کابینہ نے اس معاملے کی تحقیقات کیلئے ریٹائرڈ جج کی سربراہی میں انکوائری کمیٹی قائم کرنے کی منظوری دی تھی۔