کراچی کو حق دو مہم کے تحت احتجاجی ریلی سے خطاب کرتے ہوئے جماعت اسلامی کراچی کے امیر حافظ نعیم الرحمن نے کہا ہے کہ ملک کے تمام بڑے شہروں میں ترقی ہورہی ہے مگر کراچی کو اس کا حق نہیں دیا جارہا ہے۔ انہوں نے کہا کہ نعمت اللہ خان نے K-3 کا منصوبہ مکمل کیا اور کراچی کو 10 کروڑ گیلن اضافی پانی فراہم کیا، مگر ایم کیو ایم کی حکومت نے کراچی کو ایک قطرہ پانی فراہم نہیں کیا۔ انہوں نے کہا کہ نعمت اللہ خان نے کراچی کو 32 نئے کالج دیے۔ کراچی ملک کو اس کے وسائل کا 70 فی صد مہیا کرتا ہے مگر کراچی میں پانی اور ٹرانسپورٹ کی قلت ہے۔ شہر کی سڑکیں ٹوٹی ہوئی ہیں گٹر اُبل رہے ہیں۔ یہاں تک کہ کراچی کی آبادی تین کروڑ ہے اور مردم شماری میں اسے صرف ڈیڑھ کروڑ دکھایا گیا ہے۔ بدقسمتی سے ایم کیو ایم نے شہر کے لیے کچھ نہیں کیا۔ پیپلز پارٹی کا رویہ شہر کے سلسلے میں دشمنی پر مبنی دکھائی دیتا ہے۔ پی ٹی آئی اس وقت کراچی کی نمائندہ جماعت ہے مگر اس نے ڈھائی سال میں کراچی کو کچھ نہیں دیا۔ اس تناظر میں جماعت اسلامی کی کراچی کو حق دو مہم وقت کی آواز ہے اور کراچی کے ہر شہری کو اس مہم کی حمایت کرنی چاہیے۔