انقرہ: ترکی نے امریکہ کے کاروباری شہر شکاگو میں ٹریڈ سینٹر قائم کر دیا ہے، جس سے ترک برآمدکنندگان کو ایک نیٹ ورک فراہم کیا جائے گا جہاں وہ اپنی مصنوعات اور برانڈز کی نمائش کر سکیں گے۔
غیر ملکی میڈیا رپورٹس کے مطابق ترک وزیر تجارت روحسار پیکجن کا کہنا ہے کہ گذشتہ سال ترکی کی امریکہ کو ایکسپورٹس میں غیر معمولی اضافہ ہوا ہے،ترکی اس بڑھتی ہوئی تجارت کے رجحان کو جاری رکھنا چاہتا ہے تاکہ امریکہ کے ساتھ طویل مدتی تجارتی معاہدے کئے جا سکیں۔
انہوں نے مزید کہا کہ ترکی کے بڑے ٹریڈنگ پارٹنرز میں حکومت ایکسپورٹرز کے لئے ہر ممکن تعاون کرے گی اور وزارت تجارت ہر چھوٹے بڑے تجارتی موقع کو ضائع کئے بغیر تاجروں کی مدد کرے گی۔
روحسار پیکجن کا مزید کہنا تھا کہ عالمی تجارت میں ہر روز ایک نئی جدت آ رہی ہے، پالیسی اور فیصلہ سازوں کے ساتھ ایکسپورٹرز کو ایک ہی میز پر بیٹھ کر پالیسی بنانا ہو گی تاکہ عالمی مارکیٹ میں مسابقت کا مقابلہ کیا جا سکے۔
ترک وزیر تجارت نے مزید کہا کہ شکاگو امریکہ کے صنعتی شعبے کا پروڈکشن سینٹر ہے،ترکی جلد ہی چین اور بھارت میں ٹریڈ سینٹرز کھولے گا۔