لاہور (نمائندہ جسارت)احتساب عدالت لاہور نے مسلم لیگ ن کے صدر و سابق وزیر اعلیٰ پنجاب شہباز شریف اور ان کے اہل خانہ سمیت دیگر ملزمان کیخلاف منی لانڈرنگ اور آمدن سے زاید اثاثہ جات ریفرنس میں بار بار طلبی نوٹس کے باوجود عدم پیشی پر شہباز شریف کی بیٹی رابعہ عمران کو اشتہاری قرار دینے کی کارروائی کاحکم دے دیا،عدالت نے عدم پیشی پر رابعہ کے ناقابل ضمانت وارنٹ بھی جاری کر دیے۔احتساب عدالت کے ایڈمن جج جواد الحسن نے ریفرنس میں نامزد شہباز شریف کی بیٹی رابعہ عمران کو اشتہاری قرار دینے کا حکم جاری کیا۔ عدالت نے کہا کہ رابعہ عمران ملک سے باہر فرار ہو چکی ہے اور وارنٹ پر بھی عمل درآمد نہ ہو سکا، اس لیے عدالت رابعہ عمران کو اشتہاری قرار دینے کی کارروائی کا حکم دیتی ہے۔ عدالت کو آگاہ کیا گیا کہ تفتیشی افسر نے شہباز شریف کی بیٹی کے گھر کے باہر اور دیگر مقامات پر نوٹس آویزاں کردیے ہیں۔
