قومی ٹی ٹوئنٹی خیبرپختونخواہ کامیاب ،فخر زمان کی نصف سنچری

130

راولپنڈی(نمائندہ خصوصی) قومی ٹی ٹوئنٹی کپ کے 21ویںمیچ میں فخر زمان کی نصف سنچری اور مصدق احمد کی دھواں دھار بیٹنگ کی بدولت خیبرپختونخوا نے سدرن پنجاب کو 73رنز کے بھاری مارجن سے شکست دے دی۔ ایونٹ میں 5 ویں کامیابی نے خیبرپختونخوا کی سیمی فائنل میں رسائی کے امکانات روشن کردئیے ہیں جبکہ ایونٹ کے 7 میں سے 6 میچز ہار نے کے بعد سدرن پنجاب کے لیے فائنل 4میں جگہ بنانا مزید مشکل ہوگیا ہے۔پنڈی کرکٹ اسٹیڈیم راولپنڈی میں کھیلے گئے میچ میں 206 رنز کے تعاقب میں سدرن پنجاب کی پوری ٹیم132 رنز بنا کر آؤٹ ہوگئی۔ آل راؤنڈر محمد عمران 48 رنز بناکر سب سے نمایاں رہے۔ انہوں نے 28 گیندوں پر 6 چوکے اور2 چھکے لگائے۔ سیکنڈ الیون میں عمدہ کارکردگی کی بدولت فرسٹ الیون اسکواڈ میں جگہ بنانے والے زین عباس 34 رنز بناکر آؤٹ ہوئے۔ خیبرپختونخوا کے 5 کھلاڑی ڈبل فگرز میں بھی نہ پہنچ سکے۔ خیبرپختونخوا کے جنید خان نے 2، جبکہ شاہین شاہ آفریدی، ارشد اقبال،مصدق احمد، شعیب ملک اور وہاب ریاض نے ایک، ایک وکٹ حاصل کی۔اس سے قبل سدرن پنجاب کے کپتان شان مسعود نے ٹاس جیت کر پہلے فیلڈنگ کا فیصلہ کیا تو خیبرپختونخوا کے اوپنر فخر زمان نے 34 گیندوں پر 11 چوکوں اور 2 چھکوں کی مدد سے 68 رنز بنائے۔ کپتان محمد رضوان کے 12 رنز پر پویلین واپس لوٹنے پر بائیں ہاتھ کے اوپنر نے محمد حفیظ کے ہمراہ 71 رنز کی شراکت قائم کی۔ محمد حفیظ 17 رنزبناکر آؤٹ ہوئے۔اننگز کے اختتامی اوورز میں مصدق احمد نے 9 گیندوں پر 3 چوکوں اور 3 چھکوں کی مدد سے ناٹ آؤٹ 33 رنز کی برق رفتار اننگز کھیل کر ٹیم کا مجموعہ 200 رنزکے پار پہنچانے میں مدد کی۔ انہوں نے شعیب ملک کے ہمراہ 5ویں وکٹ کے لیے 43 رنز کی ناقابل شکست شراکت قائم کی۔شعیب ملک بھی 33 رنز بناکر ناٹ آؤٹ رہے۔سدرن پنجاب کے عامر یامین اور محمد الیاس نے 2،2 وکٹیں حاصل کیں۔مین آف دی میچ کا ایوارڈ جیتنے والے فخر زمان کاکہنا ہے کہ پنڈی کرکٹ اسٹیڈیم کی پچ بیٹسمین کے ساتھ ساتھ بولرز دونوں کے لیے سازگار ہے، جو شعبہ بھی محنت کرتا ہے اسے اس پچ سے مدد ملنا شروع ہوجاتی ہے۔ انہوں نے کہا کہ خیبرپختونخوا نے میچ میں بہترین فیلڈنگ کا مظاہرہ کیا، امید ہے کہ ایونٹ کے بقیہ میچوں میں یہ تسلسل برقرار رہے گا۔