کراچی: ایم کیو ایم پاکستان کے کنوینئر خالد مقبول صدیقی نے 24ستمبر سے کراچی مارچ کا اعلان کردیا۔
کراچی میں میڈیا سے گفتگو کرتے ہوئے خالد مقبول صدیقی نے کہا کہ 24ستمبر سے کراچی مارچ سے احتجاجی مہم کا آغاز کررہے ہیں 13سال سے کراچی اور سندھ کے دیگر شہروں کو جان بوجھ کر تباہ کرنے کی سازشیں کی گئیں، 24ستمبر کی ریلی سندھ کے مستقل باشندوں کا حق حکمرانی تسلیم کرانے کے لیے ہے۔
انہوں نے کہا کہ ہمیں 30سالوں سے قومی سیاسی دھارے میں شامل نہیں کیا گیا، ہم سے کیے گئے کسی وعدے پر عمل نہیں کیا، ملک میں جہاں پر بھی حق تلفی ہورہی ہے وہاں صوبے بنائے جائیں۔خالد مقبول صدیقی نے جماعت اسلامی کے حقوق کراچی مارچ کی حمایت کا بھی اعلان کیا۔
انہوں نے کہا کہ پیپلزپارٹی کی تعصبانہ حکومت کے خلاف اور کراچی کے عوام کو حقوق دلانے کے لیے 24ستمبر کو احتجاج کیا جائے گا، سندھ کو اس نسل پرست صوبائی حکومت کے رحم و کرم پر چھوڑا گیا۔خالد مقبول صدیقی کا کہنا تھا کہ اسلام آباد کے ایوان کی لائٹیں بھی کراچی کے پیسوں سے روشن ہیں، کراچی کے پیسوں سے موٹروے بن رہے ہیں اور بجٹ بن رہے ہیں، اب لوگوں کو اپنے حق حکمرانی کے لے گھروں سے نکلنا ہوگا
