والد کی خاطر پاکستان آنے کیلیے بیتاب وقاریونس آسٹریلیا میں پھنس گئے

54

کراچی (اسٹاف رپورٹر ) پاکستان کرکٹ ٹیم کے بولنگ کوچ وقار یونس کے والد اس وقت شدید علیل ہیں، جس کے لیے وہ پاکستان آنا چاہتے ہیں، تاہم ایسے میں آسٹریلیا میں پھنس گئے ۔ قومی ٹیم کے ہمراہ دورہ انگلینڈ پر موجود 48 سالہ وقار یونس ٹور مکمل کرنے کے بعد اپنے اہلِ خانہ کے پاس آسٹریلیا پہنچے۔ سڈنی پہنچنے کے بعد وہ نیو ساؤتھ ویلز کوویڈ 19 پروٹو کولز کے تحت 14 روز قرنطینہ میں چلے گئے تاہم اسی دوران لاہور میں ان کے والد کی طبیعت شدید خراب ہوئی اور انھیں ہسپتال منتقل کردیا گیا۔والد کی بیماری کی اطلاع ملتے ہی وقار یونس بھی پریشان ہوگئے، تاہم وہ اس وقت قرنطینہ مکمل کر رہے ہیں جس کے باعث انہیں وہاں سے نکلنے میں دشواری کا سامنا ہے۔ وقار یونس پاکستان آنے کے لیے کوشاں ہیں، لیکن انہیں نیوساؤتھ ویلز قوانین کے مطابق قرنطینہ بھی مکمل کرنا ہے۔ان کے اہل خانہ نے بہی خواہوں سے دعائے صحت کی اپیل کی ہے۔