حالیہ بارش سے 70 بچوں اور 20 خواتین سمیت 176 اموات

اسلام آباد(مانیٹرنگ ڈیسک) مون سون سیزن میں ہونے والی طوفانی بارش کے باعث ملک میں مجموعی طور پر اموات کی تعداد 176 ہوگئی ہے جبکہ اس دوران 1307 مکانات مکمل تباہ اور 853 کو جزوی طور پرنقصان پہنچا ہے۔نجی ٹی وی کے مطابق این ڈی ایم اے نے مون سون بارش اور سیلاب کے دوران جانی و مالی نقصانات کی تفصیلات جاری کردی ہیں جس کے مطابق مون سون سیزن میں مجموعی اموات کی تعداد 176 ہوگئی ہے۔رپورٹ کے مطابق
جاں بحق ہونے والوں میں 70 کم عمر بچے، 20 خواتین اور 86 مرد شامل ہیں، بارش و سیلابی تباہ کاریوں کے نتیجے میں سب سے زیادہ سندھ میں 72 افرادجاں بحق ہوئے، جب کہ پنجاب میں 16، خیبر پختونخوا میں 48، بلوچستان میں 19، کشمیر میں10 اور گلگت بلتستان میں 11 افراد جان کی بازی ہارگئے۔این ڈی ایم اے کی رپورٹ میں بتایا گیا ہے کہ بارش و سیلابی تباہ کاریوں کے نتیجے میں 101 افراد زخمی بھی ہوئے اور زخمی ہونے والوں میں 17 کم عمر بچے، 11 خواتین اور 73 مرد شامل ہیں۔رپورٹ کے مطابق شدید بارش سے 10 سڑکیں، 9 پل، 1 ہوٹل، 3 دکانیں، 4 مساجد اور 2 پاور ہاوسز کو بھی نقصان پہنچا، 1307 مکانات مکمل طور پر تباہ ہوئے جبکہ 853 مکانات کو جزوی نقصان پہنچا ہے۔