ریلوے ملازمین کوبقایا جات جلد ادا کیے جائیں‘ محمد اکبر

59

ریلوے ورکرز یونین ورکشاپس کے رہنما اور پاکستان مزدور محاذ لاہور کے نائب صدر محمد اکبر نے اپنے ایک بیان میں کہا ہے کہ ریلوے انتظامیہ ریلوے کے ریٹائرڈ ہونے والے ملازمین کو گریجوٹی سمیت ان کے تمام بقایا جات فوری ادا کرے۔ انہوں نے کہا کہ اس وقت صورت حال یہ ہے کہ ریٹائرڈ ہونے والے ملازمین کئی کئی ماہ سے اپنے بقاجات کے لیے ریلوے دفاتر کے چکر کاٹ رہے ہیں لیکن ریلوے ان کے بقاجات کی ادائیگی میں ٹال مٹول سے کام لے رہی ہے۔ انہوں نے کہا کہ 60 سال کی عمر تک ادارے کی خدمت کرنے کے بعد ریٹائرڈ ہونے والے ملازمین نے ان پیسوں سے اپنے بچوں کی شادیوں سے لے کر دیگر بہت سے معاملات کو نبٹانے کی منصوبہ بندی کی ہوتی ہے لیکن ان ملازمین کو بروقت ان کے بقایا جات نہ ملنے کی وجہ سے وہ ملازمین مالی پریشانیوں کا شکار ہو جاتے ہیں۔ انہوں نے کہا کہ ریٹائرڈ ملازمین کے بقایا جات ان ملازمین کی اپنی محنت کی کمائی ہے نہ کہ کوئی حکومتی مراعات۔ انہوں نے کہا کہ اگر محکمہ ریلوے ریٹائرڈ ملازمین کو ان کے بقایا جات بروقت ادا نہیں کرتا تو ان بقایا جات کی رقوم پر ملکی قانون کے مطابق ملازمین کو منافع ادا کرے۔