حکومت آئی ایم ایف سے معاہدوں پر نظرثانی کرے‘ سراج الحق

241

لاہور( نمائندہ جسارت ) امیر جماعت اسلامی پاکستان سینیٹر سراج الحق نے کہا ہے کہ آئی ایم ایف کے ساتھ تمام معاہدوں پر نظر ثانی کی جائے ۔ آئی ایم ایف کا مقصد معیشت ٹھیک کرنا نہیں بلکہ اپنے ایجنڈے کی تکمیل ہے ۔ جب تک آئی ایم ایف کے ایجنڈے پر چلتے رہے ملکی معیشت سنبھل نہیں سکتی ۔وزیر اعظم عالمی معیشت کا رونا رونے کے بجائے گھر کی خبر لیں اور عوام کو مہنگائی ،بے روز گاری ،غربت سے بچانے اور تعلیم و صحت کی سہولتیں دینے کی طر ف توجہ دیں۔ خود وفاقی منسٹرز اپنی ناکامی کا اعتراف کررہے ہیں‘ حکومت نے اوورسیز پاکستانیوں کے ساتھ ظلم وجبر کی انتہا کردی ہے ۔اوورسیز پاکستانیوں کو لوٹا جارہا ہے ،سرکاری ایجنٹ بلیک میں ٹکٹ بیچ کر لاکھوں روپے کمارہے ہیں‘ کورونا وبا سے نپٹنے کیلیے وفاقی و صوبائی حکومتوں کا اب تک ایک پیج پر نہ آناالمیہ ہے ۔اگر ابتداء میں ہی متفقہ پالیسی بنائی جاتی تو کوروناکے پھیلائو پر قابو پایا جاسکتا تھا۔ان خیالات کا اظہار انہوں نے سوات میں سابق صوبائی وزیر حسین احمد کانجو جو گزشتہ دنوں کورونا سے وفات پاگئے تھے کی رہائش گاہ پر تعزیتی اجتماع سے خطاب کرتے ہوئے کیا۔سینیٹر سراج الحق نے کہا کہ حکومت تمام تر وعدوں اور بلندوبانگ دعوئوں کے باوجو د مہنگائی اوربے روز گاری پر قابو پانے میں ناکام رہی ۔ حکمرانوں نے ہماری آنے والی نسلوں کو بھی آئی ایم ایف اور ورلڈ بینک کی غلامی کی ہتھکڑیاں پہنا دی ہیں۔ حکمران ،نیب اور عدالتیں اپنی ذمے داریاں پوری کرتیں تو آج ملک 100ارب ڈالر سے زیادہ کا مقروض نہ ہوتا ۔کرپشن ،بدعنوانی اور رشوت ستانی جیسے جرائم کے مکمل خاتمہ کیلیے اسلامی تعلیمات کی روشنی میں فیصلے کرنا ہونگے ۔چوری کرکے بیرون ملک منتقل کی گئی قومی دولت واپس آجائے تو نا صرف پاکستان کے تمام قرضے اتر سکتے ہیں بلکہ عوام کو غربت مہنگائی ،بے روزگاری دلدل سے بھی نکالا جاسکتا ہے ۔انہوں نے کہا کہ اب تو چیف جسٹس نے نئی احتساب عدالتیں بنانے کا حکم دیتے ہوئے کہا ہے کہ نیب کا ادارہ کام نہیں کررہا ،مقدمے درج ہوتے ہیں مگر فیصلے نہیں ہوتے ،یہی ہونا ہے تو کیوں نہ نیب اور احتساب عدالتیں بند کردی جائیں ‘‘ سینیٹر سراج الحق نے کہاکہ بے لاگ احتسابی نظام کے بغیر بدعنوانی اور کرپشن کا خاتمہ خود فریبی کے سوا کچھ نہیں ۔چند لوگوں کے احتساب اور مجرموں کے آسانی سے بیرون ملک فرارکی وجہ سے پور ے نظام پر سوالات اٹھ رہے ہیں ۔ نیب کی الماریوں میں کرپشن کے 150میگا اسکینڈل کی فائلیں پڑی گل سڑ رہی ہیں مگر ان پر کوئی کاروائی نہیں کی جارہی۔پاناما کے دیگر 436 ملزموں کو بھی کوئی نہیں پوچھ رہا ۔ ان تمام کیسز پر نیب اور حکمرانوںنے ایک پراسرار خاموشی اختیار کررکھی ہے ۔ قانون افراد کیلیے نہیں بلکہ ملک و قوم کیلیے ہوناچا ہیے ۔انہوں نے کہا کہ حکومت بڑے جاگیر داروں اور سرمایہ داروں سے ٹیکس وصولی کا منظم نظام بنائے، غریبوں کو ٹیکس کی چکی میں پیستے رہنامعاشی پلاننگ نہیں ۔لوٹ کھسوٹ کے نظام کو ختم کیے بغیر ملک آگے نہیں بڑھ سکتا۔سینیٹر سراج الحق نے سابق صوبائی وزیر سائنس و ٹیکنالوجی حسین احمد کانجو کی خدمات کو زبر دست الفاظ میں خراج عقیدت پیش کیا اور کہا کہ انہوں نے اپنی پوری زندگی ملک میں اسلامی نظام کے نفاذ کیلیے انتھک محنت کی اور اپنی زندگی میں امانت و دیانت کی اعلیٰ مثال قائم کی۔