بچی کے اغوا میں معاونت کا الزام سے متعلق کیس میں عدالت نے سینیٹر میر سرفراز بگٹی کی عبوری ضمانت کی استدعا مسترد کردی۔
تفصیلات کے مطابق سپریم کورٹ کے جسٹس مظہر عالم کی سربراہی میں سپریم کورٹ کے 2 رکنی بنچ نے بچی کے اغوا میں معاونت سے متعلق کیس کی سماعت کی۔ سماعت پر سرفراز بگٹی کے وکیل بھی پیش ہوئے۔
وکیل سرفراز بگٹی نے عبوری ضمانت کی استدعا کرتے ہوئے کہا کہ عبوری ضمانت نہ ملی تومشکل ہو جائے گی۔
جسٹس مظہر عالم نے کہا کہ سرفراز بگٹی با اثر شخص ہیں، کوشش کریں بچی مل جائے۔
جسٹس قاضی امین نے کہا کہ وکیل صاحب آپ سمجھ سکتےہیں، ہم کیا کہہ رہے ہیں۔
جسٹس قاضی امین نے مزید کہا کہ سرفراز بگٹی کو 6 ماہ سے کسی نےگرفتار نہیں کیا، اب سرفراز بگٹی کو کون گرفتار کرے گا؟
عدالت نے اپنے ریماکس میں کہا کہ اگر سرفراز بگٹی کی ضمانت بنتی ہوگی تو دیں گے۔
سپریم کورٹ نے کیس کی مزید سماعت 14 جولائی تک ملتوی کردی۔