کراچی: شہر قائد کے مختلف علاقوں میں مسلسل تیسرے روز بھی کہیں ہلکی اور کہیں تیز بارش کا سلسلہ جاری رہا جبکہ کرنٹ لگنے کے واقعات میں 6 افراد جاں بحق ہوگئے۔
تفصیلات کے مطابق شہر کےمختلف علاقوں میں صبح سے ہی ہلکی بارش کا سلسلہ جاری ہے،ڈیفنس، ابراہیم حیدری، کورنگی، قیوم آباد، اختر کالونی، محمودآباد، یونیورسٹی روڈ، گلشنِ اقبال، گلستانِ جوہر اور نارتھ کراچی میں کہیں تیز اور کہیں بوندا باندی ہوئی ، بارش کے بعد مختلف علاقوں میں بارش کا پانی جمع ہے۔
ریسکیو حکام کے مطابق ناگن چورنگی مسلم ٹاؤن میں گھر میں کرنٹ لگنے سے بچہ جاں بحق ہوگیا جبکہ ناگن چورنگی کے قریب کرنٹ لگنے سے 30 سالہ شخص جاں بحق ہوگیا۔
کارساز روڈ روڈ پر بجلی کے تار سےکرنٹ لگنے سے موٹر سائیکل سوارجاں بحق ہوگیا، ماڈل کالونی اور کریم آباد میں کام کے دوران کرنٹ لگنے سے ایک شخص اور ایک مزدورجاں بحق ہوگیا۔
ترجمان کے الیکٹرک نے کارساز کراچی پر موٹرسائیکل سوار کی ہلاکت پر افسوس کا اظہارکیا ہے، ترجمان کا کہنا ہے کہ فوری کارروائی کرتے ہوئے متعلقہ افسر کو معطل کردیا گیا ہے ۔
